Алдарлыг “Центр Азии” ансамблиниң удуртукчузу, хөйге билдингир ыраажы, композитор Борис Салчактың уругларга чогаадыкчы хөгжүм лабораториязы “Салчак” студиязын ажытканындан бээр 10 чыл болган.
Кижи назыны-биле алырга, көңгүс бичии уруг, а студияның ол кыска үе дургузунда кылган ажылы, чедиишкиннери шагда-да диңмиреп үнүп келген, хөйге көскү. Студияның доозукчулары Россия чергелиг мөөрейлерге каш удаа тиилелгелери-биле Тываны, башкызын алдаржыдып чоруурлар.
Чүгле республикада эвес, а Тывадан дашкаар билдингир апарган “Салчак” студиязы ырлаар салым-чаяанныг уругларны деткип, оларны ёзулуг ыраажылар, харын-даа бичии “сылдыстар” болгужеге чедир өөредип турарын чону дыка үнелеп, деткип турар. Мында Борис Балчыровичиниң күжениишкинниг кылган ажылы улуг. Ооң бедик професссионал деңнелде уругларны өөредип турарын Россия чергелиг хөгжүмчүлер безин эскерип, хүндүткел-биле чугаалажып турар апарган. Чаңгыс “Ты супер” мөөрей дугайында чугаалаарга-ла, билдингир.
Май 4-те “Салчак” студиязының 10 чылдаанынга тураскааткан концертти чон четтикпейн манап турар. Аңаа ооң доозукчулары чалгыннарын херипкеш, уязындан ужуп үнгеш, тыва эстраданың амгы сылдыстары апаргылаан – Ай-кыс Кыргыс, Денберел Ооржак, Сайын Доржу, Ай-Херел Шулуу болгаш чалаттырган аалчылар киржир.
/ Бистиң корр.
"Шын" №28 2023 чылдың апрель 19
