Республикага апрель 1-ден тура Санитарлыг арыглаашкын болгаш чаагайжыдылга айын чарлаан. Бо айның төнчүзүнге чедир республиканың бүгү муниципалитеттеринге эртер ужурлуг санитарлыг арыглаашкын болгаш чаагайжыдылга талазы-биле хемчеглерниң планын Тываның Чазаа тургускан. Бүгү ажылдарны хайгаараар Тываның Чуртталга-коммунал ажыл-агый яамызы планның боттаныышкынын харыылаар.
Чарлаттынган ай дургузунда аңгы-аңгы объектилерниң чаагайжыдылгазы көрдүнген, ооң иштинде парктар, сесерликтер, шөлдер, төөгүлүг болгаш тураскаалдыг черлер, ол ышкаш автомобиль оруктары база тротуарлар кирип турар. Хемнер, суглар эриктеринге, каът бажыңнар девискээрлеринге, уруглар ойнаар шөлдерге база хуу бажыңнарга онза кичээнгейни салыр.
Субботниктерге чаңчыл аайы-биле ажылчын коллективтер киржир, ол ышкаш чонну ажылга хаара тудар төптерниң учедунда турар ажыл чок хамаатыларны база аңаа киириштирер. Бажыңнар девискээрлериниң ишти, бажыңнар аразының эртер черлерин, чадаг кижилер кылаштаар тротуарлар, уруглар ойнаар шөлдер болгаш сесерликтерниң арыглаашкынын башкарыкчы компаниялары база чуртталга бажыңнарының ээлериниң эштежилгелери харыылаар.
Тываның Орук-транспорт комплекизиниң яамызы регионалдыг болгаш суурлар аразының автомобиль оруктарының богун аштаанын хайгаараар.
Чарлаттынган ай дургузунда Күрүнениң чуртталга оран-сава инспекциязы хөй аал чурттаар бажыңнарның чурттакчыларының ниити ажыглаар черлерин болгаш девискээрлериниң арыг-силиин болгаш санитарлыг байдалын хынаар талазы-биле рейдилерни чорударын планнап турар.
Бистиң корр.
Чурукту интернеттен хоолгалаан.
«Шын» №12 2025 чылдың апрель 3