Саргыдан оваарныр үе келген.

Час дүжүп, чылыг үе кээрге, эгелээр эң нептереңгей аарыгларның бирээзи саргы энцефалиди болуп турар. Ук аарыгдан камгаланырының бүзүрелдиг аргазы – аңаа удур тарылга ажылдарын чорудары.

Саргы энцефалидинге удур тарылга өске тарылгалар ышкаш, организмни вируска удур туржуп шыдаар кылдыр чаңчыктырар. Кажан тарыдып алырга, саргы кижини ызырыпкан соонда, организмде тургустунуп келген камгалал иммунитет вирусту узуткап каапканындан кижи аарывайн баар азы ол аарыгны чиик хевирге эртер.

Бир эвес саргыга ызырткаш, эттинген соонда, чурттан дашкаар эккелген тарылга-биле 2 неделя болгаш, а тарылганы бистиң чуртка кылган болза, 1 ай болгаш тарып болур. Саргы энцефалидинден чылдың кайы-даа үезинде тарыдып ап болур. Ынчалза-даа тарылганы аарыгның нептереп эгелээр үезинге чедир 2 неделя арткан турда доозар ужурлуг.

Саргы энцефалидинге удур тарылганы алыр деп бодаар болза, камгалал иммунитетти дүрген тургузар арга-биле тарыдарга, 21-ден 28 хонук эрткен соонда, организм вируска удур тулчуптар шынарлыг апаар. А анаа арга-биле тарыдарга, эвээш дизе, 45 хонук негеттинер.
Саргыга удур тарыдып алырга, саргыдан кортпайн барып болур дээрзи шынга дүүшпезин эмчилер сагындырып турар. Саргы кижини ызырыптарга, ооң хоразы кижиниң организминче кире бергенинден аарый бээр. Ооң шак ол хораны кижини берге байдалга эккелбези-биле, тарылганы чорудуп турар. Тарылганы салдырып алырга, чүгле саргы энцефалидинден камгалаар, а саргының тарадып чоруп турары өске аарыглардан камгалавас. Ынчангаш саргыга ызыртпазы-биле, баш удур камгаланып болур бөдүүн дүрүмнерни сагыыры чугула.

Бир эвес тарылганың чүгле 1-ги кезээн салдырып алган, 2 дугаар тарылганы салдырып четтикпейн барган таварылгада, саргы ызырыптар болза, тарылга дузалавайн баар. Өскээр чугаалаарга, саргыга удур тарытпаан кижи ышкаш болур. Ынчангаш тарылганы шын эртип, ооң шын схемазын шилип алырындан база хамааржыр.

Саргы энцефалидинге удур тарылга 3 хемчээлден тургустунар. Аарыгга удур туржуп шыдаар иммунитет 2 дугаар тарылганы алган соонда тургустунуп келир. Саргы энцефалидинден бүрүнү-биле камгалалдыг болур деп бодаар болза, тарылганың 3 дугаар хемчээлин 2 дугаар тарылга соонда 1 чыл эрткенде тарыдар. Практикадан алырга, чоннуң хөй кезии тарылганың баштайгы 2 хемчээлин аразы 1 ай кылдыр аптарга-ла дораан камгалал иммунитет тургустунуп келир. Тарыдып алган кижилерниң 95 хуузун камгалап турар. Тарыткан кижи аарый-даа бээр болза, аарыгны чиик чадага эртер.

Тарылганың 3 кезээн алган соонда, эвээш дизе, 3 чыл дургузунда саргы энцефалидинден камгалаар. Бүрүнү-биле тарыткан соонда катап база 3 чыл болгаш чаңгыс катап тарыдар.