Август 8, 9 хүннеринде Мөңгүн-Тайга кожуунга сарлыкчылар фестивалы болур. Бо чылын фестивальга өске регионнардан болгаш кожа чыдар Моолдан аалчылар киржири манаттынып турар.
Бир дугаар фестиваль 2022 чылда муниципалдыг чадага болуп эрткенин сагындыраал. Ону эрттиреринге Тываның Чазак Даргазының грантызы деткимчени берген. Ынчан фестивальдың план-хемчеглериниң аразынга эртем-практиктиг конференция болгаш өске-даа культурлуг хемчеглер хөй эрткен. Баштайгы фестиваль эрткен соонда, Мөңгүн-Тайга кожууннуң бойдус-чурумалынче болгаш сарлык малче, ону азырап-өстүрүп турар малчыннарның көшкүн амыдыралынче туристерниң сонуургалы улгаткан.
Бо чылын болур фестиваль делегей чергелиг деңнелге эртер дээн. Ону база Тываның Чазак Даргазының грантызының 1 сая 300 муң рубль хемчээлдиг деткимчези-биле эрттирер.
Фестиваль үезинде эртем-практиктиг конференция, сарлыкчыларның чыскаалы, сарлык чарыжы, сарлыктың сүдүнден кылган ак чем болгаш эъдинден аъш-чем кылырынга мастер-класстар, сарлык дүгүнден аргаан, даараан уран-шеверлерниң кылыгларының садыг-делгелгези болгаш өске-даа солун чүүлдер планнаттынган.
Тываның эң-не ырак-узак кожуунунга болур фестивальга келген аалчылар тус черниң онзагай чараш бойдус-чурумалын болгаш төөгүнүң хаяда бижиктерин, археологтуг тураскаалдарын сонуургап көөр аргалыг болур.
Бистиң корр.
Чурукту интернет четкизинден алган.
“Шын” №47 2024 чылдың июнь 26
Сарлык фестивалы
28 июня 2024
37