Декабрь 20-де Тываның күрүне университединге “ТШО киржикчилериниң болгаш оларның өг-бүлелериниң психологтуг реабилитациязынга сарыг шажынның медитация практиказын ажыглаар аргалары” деп темалыг “төгерик стол” болуп эрткен.
Аңаа өөредилге, социал болгаш медицина организацияларының психология албаннарының ажылдакчылары болгаш удуртукчулары, берге байдалдар-биле ажылдаар психологтар, сарыг шажын төлээлери, шериг албанныгларга болгаш оларның өг-бүлелериниң кежигүннеринге дузалажыр специалистер киришкен.
Ук хемчег «ТШО киржикчилериниң болгаш оларның өг-бүлелериниң сагыш-сеткил талазы-биле психологтуг реабилитациязы: РФ-тиң сарыг шажынчы ниитилелдериниң арга-дуржулгазын ажыглаары» деп конференцияның төнчү кезээ болур.
Тываның күрүне университединиң ректору Ольга Хомушу “төгерик столдуң” киржикчилеринге байырын чедирип, ук ажылга киришкени дээш өөрүп четтиргенин илереткен. “Бөгүн мында кижи бүрүзү эртем-даа, практиктиг талазы-биле-даа бодунуң үзел-бодалын үлежир дээш келген. Силерниң чүрээңерниң ханызындан сагыш човаашкыныңарның болгаш мурнуку одуругда чоруп турар шериглеривиске дузалажыксаан чүткүлүңерниң ачызында болуп эрткен бо конференция дээрге, Сарыг шажынчы өөредилге болгаш шинчилелдерниң кады ажылдажылга фондузунуң деткимчези-биле боттанган 4 дугаар хемчег болуп турары биске аажок өөрүнчүг болуушкун. Моон-даа соңгаар кады ажылдаарывыска идегеп, өөрүп четтирип тур бис” – деп, университеттиң ректору чугаалаан.
Улаштыр конференцияның организакчыларының бирээзи, Сарыг шажынчы өөредилге болгаш шинчилелдерниң кады ажылдажылга фондузунуң президентизиниң оралакчызы Денис Возиловка сөстү берген. Бо хемчег “хостуг микрофон” хевиринге болуп турган болгаш, улаштыр-ла ТР-ниң Камбы-ламазы Гелек Нацык-Доржу, ТывКУ-нуң, Санкт-Петербургтуң профессору, психология эртемнериниң доктору Валерий Ситников, философия эртемнериниң доктору Любовь Битехтина, медицина эртемнериниң доктору Марина Чухрова, психология эртемнериниң доктору Мария Карагачёва дээш өскелер-даа боттарының үзел-бодалын илереткен. Оон аңгыда, Россияның сарыг шажынчыларының төлээлери база киришкен. Оларның аразында 55-ки даг-адыгжы бригаданың ажылдакчызы Шулуу башкы база келген.
“Төгерик столга” келген ламалар сарыг шажында мантраларны сагыш-сеткилинден катаптаарга кайы хире дээштиин демдеглеп, шын номчуурун тайылбырлаан. Ол ышкаш чүнүң-даа шын, мегезин хынап, деңней бодап тургаш, шиитпир үндүрерин Будданың сөстери-биле бадыткаан.
Келген аалчыларның хөй кезии бурганга бүзүревес-даа болза, сарыг шажынны эң-не нарын болгаш ханы уткалыг чүдүлге база өөредиг деп санап, ооң ажык-дузазы шериг албанныгларга болгаш оларның өг-бүлелеринге дуза чедиреринге улуг ужур-уткалыг болурун демдеглээн. Оларның бирээзи Санкт-Петербургтуң аргыжылга оруктарының университединиң дузалал психология кафедразының доцентизи Мария Коргачёва: “Сарыг шажын делегейде эң улуг чүдүлгелерниң бирээзи. Ол кончуг нарын болгаш, сактып алыр чүүлдер хөй. Камбы-ламаның чугаалап турары-биле алырга, мантраны номчуурга, кижиге күштү болгаш бүзүрелди бээр. Ынчангаш мен база элээн каш мантрадан ушта бижип алгаш, номчуп шенээр бодап тур мен” – деп, чугаалаан.
Оон аңгыда, бирээде, ТШО киржикчилерин баш удур белеткеп тургаш, хенертен болур психологтуг кемдээшкиннерни эвээжедип болурун демдеглээн. Ийиде, кажан кижи чүдүлгелиг болза, тускай хевирниң психологтуг азы психиктиг кемдээшкининден чайлап болур. Чүге дээрге ол мантраны номчуп тургаш, кандыг-даа дүшкүүрлүг болуушкуннар болуп турда, чааскаан эвес, Будда азы кандыг-бир бурган аңаа дузалап турар дээрзин ол медереп билир. Өскээр чугаалаарга, дайынчы соруу бедик деп чүүлдү көргүскени ол.
Болуп эрткен конференцияның хемчеглеринден алдынган материалдарны чыггаш, дептержигеш кылыр сорулганы салган.
Чыжыргана СААЯ.
Чуруктарны ТывКУ-нуң сайтызындан алган.
“Шын” №98 2023 чылдың декабрь 23
