Чоокта чаа Тула хоорайга 16 харга чедир мөгелер аразынга Россияның бирги чери дээш хостуг хүреш маргылдаазынга 58 региондан 538 мөге киришкен. Бистиң республикадан спортчу командалар белеткээр төптүң тренери Сат-Ок Кенден баштаан 22 мөге киржип чораан. Оларны тренерлер, ада-иелер, каттышкаш, 19 кижи деткикчилеп чорааннар.
Сат-Ок Кенденниң дыңнадыы-биле алырга, бистиң мөгелеривистен 57 килге Ай-Демир Попуу база 62 килге Алаан Ондар 3-кү шаңналдыг чер дээш хүрештерге аштырганнар. Россияның 18 харга чедир мөгелер аразынга хамыкты кайгаткан Чадаананың олимпийжи курлавырлар спорт школазының мөгези Чиңгис Сарыглар бодунуң 16 хар үе-чергези 41 килдиг мөгелерни шуптузун бүзүрелдиг ойнаан. Түңнел хүрешке Москва облазы дээш хүрешкен кабардин мөге Джамал Бакаевти 12:2 сан-биле бүзүрелдиг ойнааш, чемпион атка төлептиг болган. Бичии 16 харлыг мөге база тренери Меңги Монгуш Чөөн-Хемчик кожуундан деткикчилер фондузунуң бүзүрелин бадыткап, Россияның спорт мастери деп атты күүсеткеш, чемпионаттың тергиин мөгези деп бедик аттың шаңналын алган. Ол дээрге улуг чоргаарал-дыр.
Аңаа немештир Чиңгис Сарыглар бо чылын Европаның бирги чери дээш маргылдаага июль 6–9 хүннеринде Венгрияга барып киржир эргени чаалап алган. Чадаананың Монгуш Чечен-оол аттыг олимпийжи курлавырлар спорт школазының бо чылгы чедиишкиннери арбын.
Школаның тренерлеринге, мөгелеринге база ооң директору Айдыс Ооржакка май 12-де Моолдуң Эрдэнэт хоорайынга болуп эрткен элээди оолдар аразынга делегей чергелиг дзюдо маргылдаазынга хүлер медальдың эдилекчизи Арслан Монгушту белеткээни дээш тыва чоннуң мурнундан изиг байырны чедирдивис. Ам-даа бурунгаар мөгелер!
Алексей ЧАМБАЛ-ООЛ.
"Шын" №37 2023 чылдың май 23
