1969 чылдың апрель11-де Тывага төөгүлүг болуушкун болган. Тыва АССР-ниң Дээди Совединиң Президиумунуң Чарлыы ёзугаар Күрүнениң ыры болгаш танцы ансамбли “Саяннар” тургустунган. Ансамбльдиң тургустунганы Кызылдың уран чүүл училищезиниң башкылар коллективи биле сургуулдарының чогаадыкчы ажылы-биле холбашкан, чүге дээрге ук училище чанында "Чечек" бот-тывынгыр национал ансамбльга үндезилээн болуп турар.
“Ээлдек шыңгырааш”, “Хамның самы”, “Сыынның самы”, “Байырлалдың сюитазы”, “Аңчы биле лань”, “Дамбыралар”, “Чечек”, “Тывада наадым”, хореографтыг композициялар болгаш “Тооруктуг долгай таңдым”, «Бай-ла Тайгам», «Опей ыры», «Ала караан дешкен болза…», «Дынгылдай», «Алды баштыг Кара-Дагны» деп ыр композициялары ансамбльдиң “визитказы” апарган болгаш “Алдын фондуже” кирген.
Амгы ансамбльдиң коллективи доктаамал аныяк специалистер-биле чаартынып турар болгаш ында дээре дээн национал күүселделиг күш хаара туттунган.
Ансамбль российжи болгаш делегей сценаларынга Тываның “визитная карточказы” болуп турар. Ол тыва чоннуң онзагай бүдүштүг уран чүүлүн чүгле эрги Совет Эвилелиниң эвес, а амгы Россияның көрүкчүлеринге таныштырган. Ансамбль Япония, Чехословакия, Болгария, Румыния, Монголия, Франция, ФРГ, Кампучия, Австрия, Греция, АКШ, Италия, Швейцария, Куба, Филиппиннер, Испания, Кореяга улуг чедиишкинниг ойнап турган.
Чылдан-чылче ансамбльдың чогаадыкчы арга-хемчээли калбарып турар. “Саяннар” ансамбли — тыва чоннуң культуразының эртинези, шыгжамыры-дыр. Ол – чоннар аразында эң дээре национал ёзу-чаңчылдарны суртаалдавышаан, кижилерниң мөзү-бүдүжүн, культуразын экижидер аңгы-аңгы омак-сөөктүг кижилерниң аразынга чугаа чорудар делегей элчини-дир.
Хөй-хөй шылгараңгай номерлери база оларны магадаан бүгү делегейниң көрүкчүлери-биле ужуражылгалары ам-даа ансамбльдиң мурнунда дээрзи чигзиниг чок.
ТР-ниң Культура яамызының медээзи
#Шынсолун#ТеатрмузыкиитанцаСаяны#Саяннар_54харлаан
