Сбербанкының президентизи, баштаар чериниң даргазы Герман Греф бистиң республикага кээп чораан.
Тываның Баштыңы Владислав Ховалыг Герман Грефке Тываның чараш агаар-бойдузунуң, аржаан сугларының дугайында чугаалап берип, Израильде Өлүг далай ышкаш эм-дом шынарларлыг, бүгү Россияга болгаш оон дашкаар ат-сураглыг, материалдыг баазазы болгаш эмнелге ачы-дузазы бедик деңнелге чаарттынган Чедер курортту көргүскен. Герман Греф бо курорттуң амгы байдалын эки деп үнелээн. Чедер хөлдүң чоогунда база-ла эм-дом шынарлыг Хадың, Каък хөлдерге база олар чорааннар. Кызыл хоорайдан ырак эвесте “Алдын-Булак” этно-культурлуг комплекске аалчы баргаш, тыва культура-биле улам чоок танышкан, “Алаш” ансамбльдиң артистериниң сыгыт-хөөмейин магадап дыңнаан.
Сбербанкының президентизи Герман Греф-биле ужуражылга үезинде Тываның Баштыңы Владислав Ховалыг российжи-кыдат экономиктиг кады ажылдажылга угланыышкынынга республиканың девискээринге боттандырып чорудар төлевилелдер дугайында тодаргайы-биле аалчыга чугаалап берген. Олар дээрге бистиң республиканың девискээри-биле автотранспорт шугумун тудуп эрттирери, Тывага чөөн чүк медициназының төвүн тургузары, буддизм университедин ажыдары болгаш үш сылдыстыг аалчылар бажыңын тудары дээш оон-даа өске төлевилелдер.
Сбербанкының деткимчези-биле Кызыл хоорайда туткан чаа микрорайоннарны Владислав Ховалыг биле Герман Греф барып көргеннер. Чиигелделиг ипотекадан аңгыда, дистанциялыг медицина, өөредилге төлевилелдери дээш өске-даа угланыышкыннарга Тыва Сбербанкыдан дуза ап турарын Владислав Ховалыг демдеглээн.
Бистиң чаңгыс чер чурттугларывыс фронтучулар, Тываның эрес-дидим оолдары миномётчулар Шумов алышкыларга тураскаал тургузар черни Герман Грефке республиканың удуртукчузу көргүскен. Шумов алышкыларга тураскаалды Кызылда 17 дугаар школаның чоогунда сесерликке тургузар. Ол сесерликти чаагайжыдар талазы-биле ажылдарны чоруткан. Алдарлыг 6 миномётчу Шумов алышкыларга тураскаалды тургузарын Россияның Президентизи В. Путин деткээн. Тураскаалдың эскизиниң автору билдингир российжи скульптор Виталий Дмитриевич Шанов. Бо скульптор “Кызыл кош” деп тураскаалдың база эскизиниң автору дээрзин аалчыга Владислав Ховалыг дыңнаткан.
Владислав Ховалыг биле Герман Грефтиң ужуражылгазының түңнелинде Сбербанк биле ТР-ниң Чазааның кады ажылдажылгазының дугайында дугуржулганы чарган.
Ш. МОНГУШ белеткээн.
Чиңгис СААЯНЫҢ тырттырган чуруу.
“Шын” №35 2005 чылдың сентябрь 11
