Сферумнуң ажылдаар чуруму Zoom-биле дөмей. Ол – Россияның девискээринде эң-не айыыл чок программаларның бирээзи.
Тываның 171 школазында “Сферум” өөредилге программазы ажылдап турар. Ында башкылар, өөреникчилер болгаш оларның ада-иелериниң хууда кабинеттерин кожуп каан. Оларның 164 (96 хуу) идепкейлиг арыннарлыг (профиль). Ында 5 202 башкы биле 19 671 өөреникчи бүрүткеттинген. Оон ыңай хөй санныг өөредилге программалары-биле таныжып, оларны өөредилгеге ажыглап болур.
Сферумнуң киржикчилери бот-боттарының аразында медээлер-биле айыыл чок солчуп, бөлүктеринге харылзажып, кичээлдерге чугула материалдарны оон ажыглап болур. Ол ышкаш школаның чугула хемчеглеринге киржир.
Билиг шынарын хынаар институттуң директору Виктория Донгактың дыңнатканы-биле, республика школалары ук программаже 2022 чылдың ноябрь айдан тура коштунуп эгелээн. Школалар ук системада ажылының аайы-биле эки өскерилгелерни көргүзүп турар.
Өөредилге яамызы ада-иелерни болгаш башкыларны “Сферум” программазының бөлүүнге идепкейлиг харылзажып, кады ажылдаарын кыйгырып турар. Ооң дузазы-биле школа болгаш ада-иелер аразынга ажылдаары чиик болур. Ол ышкаш демниг ажылдажылганың айтырыгларын чогударынга ажык-дузазын демдеглеп турар.
/ Бистиң корр.
"Шын" №27 2023 чылдың апрель 15
"Сферумнуң" ажыл-чорудуу
17 апреля 2023
62