Күзелдер шивизи
«Мээӊ-биле кады күзелдерни бодап ал» төлевилелдиӊ “Күзелдер шивизи” деп Бүгү-российжи акциязы Россияга 2018 чылдан тура, а Тывага 2020 чылдан эгелеп боттанып эгелээн.
2024 чылдың декабрь 5-те «Кады бис» деп делегей чергелиг шуулганга «Күзелдер шивизи» Бүгү-российжи акцияны РФ-тиң Президентизи Владимир Путин ажыткан. Тывага «Күзелдер шивизи» акцияны декабрь 16-да ТР-ниң Баштыңы Владислав Ховалыгның болгаш Тываның Чазааның Даргазының оралакчыларының киржилгези-биле ажыткан.
Чаа чылдың чырык байырлалының бүдүүзүнде, амыдыралынга янзы-бүрү чылдагааннарның уржуундан берге байдалга таварышкан уругларның күзелдерин бүдүрери – акцияның кол утказы болгаш сорулгазы.
Акцияның байырлыг ажыдыышкынынга ТР-ниң Баштыңы Владислав Ховалыг-биле кады Тываның Чазааның Даргазының оралакчызы Орлан Сарыглар, Айдыс Сынаа болгаш өскелер-даа кээп киришкен.
ТР-ниң Баштыңы Владислав Ховалыг чаңгыс эвес, үш уругнуң күзелин бүдүрер дээш, үш открытканы шилээн. Чаа чылдың чараш шивизинде азып каан янзы-бүрү өңнүг чараш открыткалар аразындан 5 харлыг Давааның, 9 харлыг Элеонораның болгаш 6 харлыг Тензинниң күзелдерин бижээн открыткаларны ол шилээн. Чаа чыл келгижеге чедир 3 чаштың күзелин Владислав Товарищтаевич боттандырар.
«Шагаан-Арыгның бичии чурттакчызы 6 харлыг Тензин Кызыл хоорайда бут бөмбүүнүң клуву-биле ужуржалганы күзеп турар-дыр. Уттундурбас, аянныг ужуражылганы организастаар бис» – деп, Владислав Ховалыг чугаалаан.
Орлан Сарыглар 6 харлыг Аюржананың күзелин бижээн открытканы шилип алган.
«Бөгүн республикавыста «Күзелдер шивизи» деп Бүгү-российжи акция эгелей берген. Чаш ажы-төлдүң күзелдерин бүдүрүп, оларны деткиири кончуг чугула. Хөй ажы-төлдүг өг-бүлелерниң уругларының, ада-иезиниң хайгааралы чок арткан чаштарның, ачазы ТШО киржикчизи ажы-төлдүң күзелдерин бүдүрери программаның кол сорулгазы болгай. Чаа чылдың бүдүүзүнде ажы-төлге байырлал шинчизин киирип, оларның сагыш-сеткилин өөртүрү чугула. Амыдыралында берге байдалга таварышкан уруг бүрүзү мени дээш сагыш-човап турар улус бар-дыр, мен херек-тир мен деп билип чорзун дээш бо акцияны организастаан. Чаа чылга чедир уругларның күзелдерин бүдүрер ужурлуг бис. Мээң шилип алган открыткамда 6 харлыг Аюржананың күзели таваржы берди. Ол кандыг белек күзеп турарын айытпаан, сюрприз манап турар-дыр. Аюржана меңээ белек шилиирин чөпшээрээн-дир. Ооң сонуургалдарын, чүнү хереглеп турарын кандыг-ла-бир арга-биле тодарадып алгаш, күзелин бүдүрер болган-дыр мен» – деп, Орлан Сарыглар чугаалады.
Ол ышкаш ТР-ниң экономика сайыдының хүлээлгезин күүседип турар Снежана Ховалыгның шилээн открытказында бичии Диананың күзели бижиттинген болган. Байырлалдың бүдүүзүнде Диананың күзели – манавааны өөрүшкү.
Айдың ОНДАР.
Буян ООРЖАКТЫҢ тырттырган чуруктары.
“Шын” №97 2024 чылдың декабрь 18