Хадың биле Дус-Хөлдүң эриинге, ол ышкаш Каа-Хем кожуунда Белдир деп черге дыштанылга баазаларын Россияның Экономиктиг хөгжүлде яамызының деткимчези-биле «Россия Федерациязында туризмни хөгжүдери» деп федералдыг программа ёзугаар «Туризм болгаш аалчылар хүлээп алыры» национал төлевилелдиң күүселдези-биле тудуп кылыр.
Тываның Туризм талазы-биле күрүне комитединиң ажылдап кылган төлевилелдери федералдыг мөөрейниң шилилгезин эрткеш, 2025, 2026 болгаш 2027 чылдарда төп бюджеттен деткимче акшаларын алыр даңзыже кирген. Ук программаның боттандырылгазының ачызында регионга модульдуг аалчылар бажыңнарынга 261 амгы шагның дериттинген өрээлдери ажыттынар.
Таңдының Дус-Хөлге болгаш Хадыңга турисчи комплекстерни тудар, а Каа-Хем кожууннуң Белдир деп черге арга-шинээ кызыгаарлыг кижилерге бүрүнү-биле таарыштыр тургускан Тывага бирги дыштанылга баазазының тудуу көрдүнген. Регионнуң Туризм талазы-биле күрүне комитеди паралимпийжи спортту хөгжүдер инклюзивтиг дыштанылга баазазы болур дээрзин тодараткан.
Хадың хөлге дыштанылга баазазының тудуун бо чылын эгелээр. Төлевилелде аалчылар бажыңнарының, чунар-бажыңныг, административтиг оран-саваның, чайгы террасалыг кафениң, хемчеглер эрттирер ажык шөлдүг сценаның, спортчу болгаш уруглар ойнаар шөлдерниң тудуглары көрдүнген.
О. СААЯ белеткээн.
Чурукту ТР-ниң Чазааның парлалга албанындан алган.
“Шын” №26 2025 чылдың июль 10