ХҮНЧЕ УТКУЙ!
Амыдырал кара дүнче тайлыр чыгыы,
Амгы шагның дайыны-даа коргунчуг-дур.
Күштү дөгээр, өжээнзирек дээргилер
Хүлге, ышка делегейни дүлүп болур.
Бөмбүрзектиң ол-бо чүгүнге дайын кыпсыр,
Мөзүзү чок дайынзырактар нүүрү ындыг –
Өргүн чонну өлүм-хайга чыгап алган.
Өртемчейге чурттаары-даа бергедээн-дир.
Төнчүзү чок Ада-чуртувус делгемнери,
Төрээн черивис агаар-бойдузу эргим,
Түмен-сая хамык чоннар четтинчипкеш,
Дүнче эвес, хүнче уткуй базаалыңар!
/ Соскарбаа СЕРЕНАДА.
Кызыл хоорай.
“Шын” №5 2026 чылдың февраль 12
* * *
КЫРГАН-АВА БОДАЛЫ
Кыштың соогу дидиренчиг,
Кыраан назын муңгаранчыг.
Сөөк-даяк, чүрек, өкпе
Соодал, дамыр дүвүредир.
Ажы-төлдү шынче углап,
Ажыл-ишчи кылып кагза
Сакпак адаа ажып чорбас,
Сагыш-сеткил оожургалда.
Аъш-чем өртээ аар-дыр деп,
Ажыл-хожул тывылбас деп,
Алаң кайгап орар болза,
Амыдырал сайзыравас!
/ Раиса ХОВАЛЫГ, ТР-ниң Чогаалчылар эвилелиниң кежигүнү.
* * *
Хүннүӊ, айныӊ херелдери
Хүлүмзүрүүӊ сагындырар.
Чечектерниӊ өӊгүр каазын
Чүгле сеӊээ дөмейлээр мен.
Хемчигештиң агымындан
Сээң үнүң дыңналып кээр.
Хуулгаазын аялга бооп,
Хөӊнүм чылдып, оожургадыр.
Сээң дугайында бодалдар
Сеткилимге частып чорда,
Ынакшыл деп чараш хемниӊ
Ырылары чаңгыланыр.
/ Милан КҮЖҮГЕТ.
Москва хоорай.
* * *
Кышкы кежээ, сеңээ чүге ынак мен?
Кызыл хүннүң хаяазы дээш эвес бе?
Хыраа-биле мөңгүннээштиң сиилбип каан
Кымда-даа чок угулзаң дээш эвес бе?
Часкы хүнүм, сеңээ чүге ынак мен?
Ойнап хөлзээн чаштар чаптааш ирги бе?
Ой-ла бениң кудуруунуң хылынга
Салгын үдээн игилиң дээш ирги бе?
Чайым, чайым, сеңээ чүге ынак мен?
Чашкы шаамны сагынгаштың эвес бе?
Челээш биле саарыгның адаанга
Сеткил ханып органым дээш эвес бе?
Чурукчу күс, сеңээ чүге ынак мен?
Чуртталгамның өңнери дээш ирги бе?
Чылдар санай шуужуп эрткен назыным
Чылза-чылза, душчур болгаш ындыг бе?
/ Юрий ДАВАА.
КЫШ
Будуктарда бүрүлер чок, шаарарган.
Аян тудар куштар-даа чок, шимээн барган.
Буурул тайга, арттар-сыннар дөгерези
Ак шаң харны шугланыпкаш, удуй берген.
Калчаа шуурган хая-дашка улугулап,
Калчан баштыг тайга сиртинге бөөлденип,
Күчү-күштүг Улуг-Хемни доңур үрүп,
Көөргеттинип, сыгырып каап, менип туру.
Кедээр шөлде, тайга-сында чамдык аңнар
“Кеткен хевин” хыраа-биле деңге солаан.
Соок кыштың медээчизи, херечизи
Суугунуң ак-көк ыжы дүргектелди.
/ Шораан АГБААН.
САКТЫП ЧОР МЕН
Чалыы шаамда ойнап өскен ынак чуртум
Ыраажы хем караамайда чуруттунду.
Талыгырда өске черге чорзумза-даа,
Сагыжымга бо-ла кирип келгилээр-дир.
Чараш чечээн сүзүп ойнап, чодураалап,
Кады өскен өөрлеримни сактып чор мен.
Чалыы үе база катап эргип келир чүве болза,
Катап дужуп, ойнап-хөглеп хөөрешсе.
Чуртталгамның агымының өйлүг маңы
Кызыл-хүнней бергени ол деп бодап чор мен.
Чараш чуртум өңгүр каазын магадааным
Сагыжымга ол-ла хевээр артып калыр.
/ Раиса Моңгуш.
Кызыл хоорай.
“Шын” №5 2026 чылдың февраль 12