ОКТАРГАЙЫМ
Каптагайда хөй-хөй сылдыс аразында
Хаяаланган изиг хүннүң херелдери
Айгадаң, соок бөмбүрзекти чырыдыпкаш,
Амыдырал-чуртталганы диргизипкен.
Өргүн чоннар өөрлежип, өссүннер дээш,
Өртемчейни ээнзиретпейн, ээлезин дээш,
Амыр-тайбың, эптиг-демниг чурттазын дээш,
Ава кижи ажы-төлдү бодараткан.
Чүреккейим кызыгаар чок ханызында
Сактырымга, ие-бойдус, октаргайым
Чүс-чүс, муң-муң кижилерниң аразындан
Чассыдып кээр ынак авам боду-даа дег.
ШЫДАШ, УМКА
Дайынчы эр Чаян Бүрбү
Даалга алгаш, тулчуп тургаш,
Ээн, бузук бажыңнарга
Эник ытка таварышкан.
Борбак ак-көк карактарлыг,
Бодамчалыг, өскүссүргей,
Угаанныг ыт, хөөкүй эниин
Умка деп адап алган.
Хатикону дөзээн ышкаш,
Хаски дижир уксаалыг ыт
Кажан шагда чарылбазы,
Кады чоруур өңнүү болган.
Экер-эрес Чаян Бүрбү
Ээлчеглиг шөлээ алгаш,
Өскен-төрээн Тывазынга
Өңнүү-биле кады келген.
Каш-ла хонук саадаар эвес:
«Шыдаш, Умка, манаар сен» – дээш,
Катап база аъттаныпкан,
Шынчы өңнүү ону үдээн…
Аэропорт девискээринден
Ам-даа Умка чоруй барбаан.
«Эргелиг ээм эглип кээр» дээш,
Ээзин чоктап, манавышаан…
/ Буян ЁНДАН.
АВАМ
Сарыг бүрү тоглап турда, бодараан мен,
Салым-чолум алдын күзү уттундурбаан.
Чашкы шаамдан ам бо назы четкижемге,
Чайны, күстү чеже катап көрбедим дээр!
Кыстарының, оолдарының хевин даараан
Күжүр авам сагыжымда артып калган.
Чымчак, чылыг даараан хевин кедип алгаш,
Чыккылама кыштың соогун тоовас өстүм.
Чайгап аадып, эргеледип доруктурган,
Чанывыстан ававыс ырап чорбаан.
Эпке-чөпке чагып сургаан угаадыын
Эне назы четкеш безин сагып чор мен.
Авайымның ажыл-ишчи изин истеп,
Амыдырал кокпазындан аспайн чор мен.
Чолдуг кежик оруун биске айтып берген
Човаг билбес ававыска тейлеп чор мен.
Сеткилимниң шынаазынга
чечектелип чуртта, авай
САРЫНАЛЫГ
Чамзыр акым сыгыды бооп хуула берейн –
Чайгы хүннү ырлаан хатты магададыйн.
Доржат акым каргыраазы болу берейн –
Долу чаашкын догдураажын аялгалаайн.
Сайзанактап өскен хемим саарыы болуп,
Шаңгыр акым ырызынга хөөн киирейн.
Мөңгүн-Тайга шуурганын тоовас өзер
Мөңге меңги бизеңиниң чечээ болуйн.
Малын ай деп, ыяңгылыг бадыргылаар
Мамай акым хөөмейин дыңнап алыйн.
Богда бурган артыжының айдызынга
Могай, Шанчыг өскен черим арыгланзын.
Узун назын кежиин амзап чурттап чоруур
Угбамайлаар Седип, Хемер дуңмаларым,
Ававыстың төрүп-ла каан дас кара бажыңар
Агаргыже сергек, силиг чурттаңар-ла!
/ Л.Б. СААЯ.
“Шын” №6 2026 чылдың февраль 19