ЧЕДЕН ЧЫЛДАР ЧОНУМ-БИЛЕ…
Чеден чылдар арттарын кырлап эрттим –
кадыр чорду.
Чеден чылдар хемнерин эштип кештим –
шакпын чорду.
Чеден чылдар черим кезип кылаштадым –
төнчү чок-тур!
Чеден чылдар чонум-биле тудуш чор мен –
чоргааранчыын!
Кызыл хүнче кыйгы салган, хензиңийе
ылбың чаштар
Кирнин кезип, өртемчейге чурттаарынга
дуза каттым.
Чонумайның аарыг-аржыын сеткилимден
эмнеп чордум.
Чогаалдарымга чонум алгап, йөрээл салып,
сөңнеп чор мен.
Чедип чорааш, азырап каан уруг-дарыым
аймак болган.
Черин-чуртун айыраң-каас шимеп чорлар –
чечектер дег.
Чеден чылдар аас-кежиин өөрүп билген –
Ава-дыр мен.
“Четтирдим” деп күдүк базып тейлеп чор мен –
Бурган башкыга.
/ Раиса ХОВАЛЫГ, ТР-ниң Чогаалчылар эвилелиниң кежигүнү.
ШҮЛҮКЧҮГЕШ
Сорбуланган сеткилимниң балыгларын
Докпак-биле улай-улай улдаан ышкаш,
Соп-ла чоруур күжүр чүрээм саргый бээрге,
Дораан-на шүлүкчүгеш бодараан дег.
Чурумалдыг сесерликтиң чечээ ышкаш,
Чуртталганың чүзүн-баазын чараш өңүн
Шааң-биле алгап-мактап ырлап чор дээн
Чагыг болуп, шүлүкчүгеш чүгленген дег.
Чассып өскен авам ышкаш төрээн черим
Чаа-Хөлүм, Булуң-Терээм кыйгы сөзү,
Согун ышкаш, чүрээм өттүр дээптерге,
Шорбажылаан одуруглар улашкан дег.
Мегечи бо өртемчейниң үүлези
Мээң нүүрүм, өчүүң кайыл, сөгле дээнзиг,
Хайыра чок кадыг-шириин негей бээрге,
Каш-ла сөстүг одуруглар чыскаалган дег.
/ Буян ЁНДАН.
УТТУНДУРБАС
Чаңгыс суурга ойнап өскеним
Чараш кыска таварыштым.
Аныяк шаавыс эрткен-даа бол,
Ам-даа чаражын магададым.
Каттырымзаан карактарлыг,
Курлак чедир узун чаштыг,
Кызыл чаактыг ол-ла кыс
Кажанда-даа уттундурбас.
Онза чараш шырай-арны,
Окпан-чикпен аажы-чаңы
Оолдарның ынакшылын
Доюлдуруп чораан-на ийин.
/ С. МААДЫР-ООЛ.
Чурукту ГигаЧатка чураан.
“Шын” №10 2026 чылдың март 19