Шрифт
А А А
Фон
Ц Ц Ц Ц Ц
Изображения
Озвучка выделенного текста
Настройки
Обычная версия
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы
(видео, карты и т.д.)
Вернуть настройки по умолчанию
Настройки Обычная версия
Шрифт
А А А
Фон
Ц Ц Ц Ц Ц
Изображения
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы (видео, карты и т.д.)
Вернуть настройки по умолчанию

ШҮЛҮК КЫДЫРААЖЫНДАН

28 ноября 2023
15

Ава чүрээ

Ава кижи дириг чораан назынында:
«Ажы-төлүм менди, кадык чорзуннар» – дээр.
Шаптараазын, кадыг-бергээ таварышса,
«Чаңгыс бодум чүктепсимзе, ажырбас» – дээр.

Идик-хептиң чаазын-даа, чаражын-даа
Ие кижи уруг-дарыын кетсиннер дээр.
Аъш-чемниң чаагай, таптыг амданныын-даа
Ажы-төлге арттырып каан турар ийик.

Кылыр ишке, өөредилгээ, чуртталгага
Кызы, оглу эрес-кежээ, соруктуг бооп,
Чонунуң-даа, иениң-даа арын-нүүрүн
Човатпайн, өөрүшкүнү шаңнап чорзун!

Алдынга-даа, мөңгүнге-даа солуп болбас,
Арыг шынны салгалынга айтып чоруур,
Ачы-буян, өлчей бүргээн ава чүрээн
Алдаржыдып, уран ырга мөңгежидээл!

/ Екатерина СААЯ.

Авам чагыы

Аажы-чаңың каржы чорбас,
Ажыл-ишке бүдүштүг бол.
Чонуң-биле чолукшуп чор,
Чогуш-содаа үндүрбейн чор.

Авамның бо чагыглары
Арыг ханда сиңе берген,
Дамыр санай тарай берген,
Дазылданып чурттап чоруур.

Уругларың оглу, кызы
Угуң дөзеп, бүдүштүг бооп,
Ажыл-ишке шудургу бооп,
Адың, одуң тудуп чор бис.

/ Бичии-Уруг КЫРГЫС.

Авамга


Түреп-човап, аштай берген үемде,
Авам сени ол-ла дораан чоктаар мен.
Дүне када караңгыда болганчок
Авамның, сээң, хоюг үнүң дыңнаар мен.

Уйгу-дүжүм кидин түлүк өйүнде
Уруумайлаан оожум кыйгың дыңналыр.
Сырбаш кыннып, аяар караам көөрүмге,
Чырык эргим хевириң чок, дүжүм боор.

Каяа-даа бол чораанымда, кулаамга
Авамның, сээң, чагыг-сөзүң дыңналыр.
«Ам-даа эки өөрен, уруум» — дээниңни
Кажанда-даа сорук кирип, сактыр мен.

/ Ульяна КУУЛАР.

Авам чурту — Көгей сыны


Каас шыктыг Көгей сыны
Калган авам чурту чораан.
Чашкы шаанда ойнап өскен,
«Чараш даштыг» хонажы ол.

Сайның дажын холга саарып,
Сайзанактап чораан чери.
Суггур чаъстың дамдызынга
Чугдунган дег, балаттынган.

Кежээ барып аштап каарга,
Кедергей-ле чараш даштар.
Катап база төрүп каан боор,
Кайгап-ханмас бойдустуг чер.

Ыдыктыг мээң төрээн черим
Ылап чараш сай-ла даштыг.
Ынай чаштан ойнап өскен
Ынак авам чурту чараш.

Колхозтажып көшпээн болза,
Хөөкүй авам чуртун кагбас.
Кожааланган Барыын-Туруу
Хомудаан дег, артып кагбас.

/ Вера ЭРЕНДЕЙ.

2001 чылда чырыкче үнген «Мөңгүн ужук» деп кыс чогаалчыларның чыынды номундан алган.

Чурукту интернеттен алган.