ЧАГ-ЛА, ЧАЪЗЫМ!
Өзээнче киир доңмаан черниң
Өлү-шыгы кургап үнгеш,
Чавыс кара булуттардан
Чаъстар болуп эглир болгай.
Көккүр дээрде улчумалдар –
Көжүп чоруур көвей булут
Черивисти кургатпас дээш,
Сеткилинден шыгыдыптар.
Частың айы апрельде-ле
Чазык чаңнап экииргексээн.
Даңны уткуй кудуп хонган
Тааланчыг суггур чаъзым.
Эртенги хүн херелинде
Эргим черим аян кирди.
Чаагай дүжүт оштаан ышкаш,
Чаг-ла, чаг-ла, сергекпейим!
Санчы БЕЖЕНБИЛ.
ЭРТИНЕНИ КАГБААЛ
Дөрбет, хакас, шор, нанай биче чоннар
Төрээн дылын уттур чыгаан, муңгаранчыын.
Тыва чонга ындыг айыыл келбезин дээш,
Тыва дылдың ээзи бистер чүнү канчаал?
Тыва уруг төрүттүнүп келирге-ле,
Тыва дылга чугаалажып эгелээли.
Оон дээре арга черле тывылбас-тыр,
Ону шупту тыва улус угаап бодаал.
Ээзи дылын салгалынга өөретпеске,
Эвээш үе дургузунда уттундургаш,
Эгиттинмес каража бооп олчаан чидер,
Эртиневис тыва дылды черле кагбаал.
Нацияның төрээн дылын билир боору –
Аңгы чон бооп артарынга магадылал.
Ынчангаштың тыва дылга ажы-төлдү
Ынай чаштан чугааладып өөредиили.
Арнын көөрге, азиат деп билдинзе-даа,
Аймак-сөөгү чогум кымыл, чүүден билир?
Тыва мен деп, өске чоннар аразынга
Шынзыдыптар күштүг чепсээң – дылың кагба.
Анчымаа ХЕРТЕК, хоочун башкы.
Бай-Тайга.
* * *
Чыылган улус аразындан
Чүгле мени дилеп турдуң.
Сагынганың илдең чорду,
Сагыжымга энерелдиин.
Сени көргеш, дужуксаар мен,
Сеткилимге тааржыр сен.
Чазык чаңың көрүксээр мен,
Чаптап, кожа чоруксаар мен.
Чанымда сен чок-ла болза,
Чалыы чүрээм хөлзей бээр-дир.
Сагыш саарзык, хүннер чылбас,
Саймааралга алзы бээр мен.
Оран-чурттан сенден өске
Отчугажым тывылбас-даа.
Март, 2019 ч.
Бараат ДЕЛЕГ-ООЛ.
«Шын» №28 2024 чылдың апрель 13