ЧАА-ХӨЛ ХЕМИМ, ЫРЛА-ЫРЛА!
Чадаганның хылдары дег бырлаңнары
Даштар кырлап, сарынналып, чалгып чыдар.
Чашкы шаавыс эргим өйүн сагындырар,
Чараш ырың, Чаа-Хөл хемим, ырла-ырла!
Эрииң дургаар хензиг чаштан ойнап өскен,
Эргим ынак ажы-төлүң хөглүг чазы
Дарый катап сени эргип чедер душта
Чараш ырың, Чаа-Хөл хемим, ырла-ырла!
* * *
Караңгының чырык деңи төгерик ай
Чаа-Хөл хемде херел чажып, чайнай берди.
Карактарың шак ол өйде улам чырып,
Чалыы чүрээм шимиредир кылаңнашты.
Ынакшылдың ээреминге өпейлеткеш,
Ындын шүлүүм, ыржым дүне чаңгыланды.
Сеткилимниң ханызындан үнген сөстер
Сени, мени оожум самче чалай берди.
Тимур КАДЫН-НАВА.
АВАМ ЧУРТУ
Алызындан ажыл-ишчи, эрес чоннуг,
Алдар-ады алгыг тараан малчыннарлыг,
Аңгырлар чыглып келир хөлчүгештиг
Авам чурту Ак-Даш меңээ эргим черим.
Уруу мени кавайымга чайгавышаан,
Уярадыр өпей ырын ырлап ора,
Амданныг аа сүдү-биле эмзиргештиң,
Азырап каан авыралдыг авайымны.
Сайлыг хемниң чараш дажын чыып алгаш,
Чарашсынып, сайзанагым тудуп кааным,
Ынай чаштан сеткилимден меңээ эргим,
Ынак авам буянныг чурту Ак-Дажым.
Чылбак МОҢГУШ, хоочун башкы.
ОНЗАЗЫН АЙ!
Ак-көк суглуг Сүт-Хөлүмнүң төлү болган
Алызындан чаяалгамның онзазын аар!
Хемчик хемим шапкын суунга эштип өскен,
Хертеш, силиг уругларның чаражын ай!
Артын дургаар Кызыл-Тайгаа чаглактанган,
Ада-ием чурту Чес-Булуңумнуң эргимин аар!
Күжүн шенеп, ачыр-дачыр сегиржип ап,
Хүрешкен оолчуктарның чаптанчыын ай!
Кодан чылгы, хоюн дозуп, сыгырткылаар,
Хову черде малчыннарның эрестиин ай!
Сүүзүн оъттуг чайлагларда малы көвей,
Сүт-сааны сава долган, магалыын ай!
Тос-ла маңын доозазын үндүр мунуп,
Доруг-дайга чындыңнадып чедип келгеш,
Дыдырарган чажым суйбап, чассыда бээр,
Дыңгылдайлаан эжиккейге ынаамны ай!
ЧОНУМАЙГА
Чонум чокта чогум кым мен?
Чодурарган төжек-тир мен.
Шуурган хатка эстей-ле бээр,
Хадыыр-сарыг чечек-тир мен.
Арат чонум, чуртум чокта,
Аштап чоруур тояанчы мен.
Ажыл-ишчи чонум-биле
Алчып, бержип чоруур-ла мен.
Чонум турда, омаам кончуг,
Шаар дээрде эзир дег мен.
Шарлан, пөштүг Тыва черим
Чараш кызы, төлү-ле мен.
Чалгын-чакпам чонумайга
Чоргаарланып мөгейдим!
Раиса ХОВАЛЫГ.
Сүт-Хөл.
«Шын» №9 2025 чылдың март 13