Тиилелгениң 80 чылынга база тыва эки турачы Доңмит уруу Галина Доваадорга тураскааттым
Марттың он беш чээрби үш чыл
Магалыг час дүжүп турда,
Кыргыс Доңмит аалынга
Кыс уруг бооп чаяаттындың.
Сайыр-Аксы Муңгаш өдек
Сайзанактап өскен чериң,
Сарыг-Булуң улус чону
Чартык кезии төрелдериң.
Анай чаштан эрес болгаш,
Аътка, малга кашпагайың
Эмдиктерни өөреткениң
Эрзин чону утпайн чору.
Чарыштарга мурнап келир
Ачазының кара доруун
Кашпагай кыс мунукчулааш,
Каш дакпыр чемпионнаан.
Элээди кыс болу бергеш,
Эрзин, Тестиң адын сыкпайн,
Самагалдай, Кызыл чедир
Саат чокка хаактааш келген.
Дөртен үш чыл август айда
Төрел чону дайын-чааже
Доңмит уруун өөрү-биле
Дөгерезин үдеп кааннар.
Орду шивээ болу берген
Ровно, Дубно, Деражно,
Эки турачы тываларның
Эң-не берге тулчуушкуну.
Октуг боону чүктеп алгаш,
Оңгуларны кезип чорааш,
Балыгланган шериглерге
Башкы дузаң көргүскен сен.
Эжин-өөрүн чидирген бол,
Ээп чанып келген-даа сен,
Тайбың ишке шылгараңгай
Дагдыныкчы болуп чордуң.
Төрээн өскен сууруңда
Төөгүлүг тураскаал бар.
Бодуң көстүп келген ышкаш,
Бодап, сактып чоруур-дур бис.
Анчымаа САНДЫКЧАП, хоочун эмчи.
28.03.2025 ч.
Хары черде ханныг дайында
Кара баштыг оолдары дээш,
Хайыралыг авалар хүннүң-не
Халак-хилээн төп чорлар.
Аалында эргим ынак эжи,
Аажок чассыг ажы-төлү,
Арай муңгак болу берген
Адазын-на манап чоруур.
Диңмиттиг дайын соксап,
Тиилелгениң хүнү чырыыр.
Тывавыстың түрлүг оолдары
Төрээн чуртунче чанып келирлер.
Орланмаа КАНЗЫВАА.
“Шын” №17 2025 чылдың май 8