Өскен-төрээн черимейим хадыңынга
Сай-ла чонум чүрээн туткан кара-суумнуң
Чанында бо чааскаанзыргай ам-даа тур сен,
Чажымдан-на көрүп өскен хадыңым сен,
Сагыжымда тугум болуп киискип чор сен.
Өскен-төрээн черимейим чаражы сен,
Өөдежок сеткилимни эмнеп чор сен,
Аккыр бодуң каяа-даа-ла чоруурумга,
Ал-ла боттуң сүлде-сүзүүн киискидер сен.
Амыраамның чаптанчыг чаш овуру дег,
Агараңнаан хөнү сының кайгамчык-ла.
Хайыралыг чалыы чараш хадыңым сээ
Катап-катап келгилээр мен — ынак-тыр мен.
Хадыңым — тук
Байырлыг че! Хадыңым — Тук, байырлыг че!
База катап «Найысылал кайы сен?!» дээш,
Ыржы чүрээм чартык кезии болуп артар,
Ышкам төпче чиик-адак чоруп орайн.
Ээр-дагыр оруктарга улчуп чорааш,
Элээр чыгаан ишти-хөңнүм дүвүрели
Чаңгыс-ла хүн дургузунда маңаа хүнзээш,
Чайгаар намдай бергенин-даа эскербедим.
Ал-ла бодум каяа-даа-ла чоруурумга,
Аккыр бодуң мурнумда бо турарың дег,
Сеткилимге ол-ла хевээр көстүп кээр сен,
Сенче оруум кезээде-ле ажык ийин.
Анай хенче назынымдан көрүп өскен
Арыг-чараш хайыралыг Хадыңым — Тук —
Тааланчыг, аяар-оожум сылдыраарың
Талыгырдан дыңналып кээр — чүрээмде сен.
/ Григорий КЫЛЫН-ООЛ.
Декабрь, 2025 чыл.
“Шын” №50 2025 чылдың декабрь 25