ЧУРТТАП ЧОРУУР
Арыг-Бажы Шарбанайда,
Арбын чоннуң аразында
Авыралды чаяап берген
Авам-ачам чурттап чоруур.
Өскелердан аңгыланып,
Эт-сеп-даа чыып чорбаан.
Өстүрүп каан уйнуктары
Эдээ долган өнчүзү ол.
Узун назын нүүрүн көрүп,
Улус-чонга хүндүлеткен,
Хөректерин шаңнал долган,
Көдээ иштиң маадырлары.
/ Андрей ХАЛБААЖЫК.
КЫЗЫЛ СЫЛДЫС
Ырап эрткен чашкы шаамны
Ында-хаая сактып кээр мен –
Чүден артык чырык сылдыс
Чүрээм өттүр чивеш-ле дээр.
Кыстың, оолдуң хөрээн каастаан
Кызыл сылдыс чайынналган
Октябряттар – хөглүг чаштар
Отрядка чыскаалган бис!
Үр-даа болбаан, бистиң отряд,
Үстүп чаштаан чинчи ышкаш,
Эргилдениң шуурганынга
Эзиннелдир бөөлдеткен…
Согунналган чидиг, чырык,
Шолбанналган кызыл сылдыс
Эң-не башкы, эң-не сөөлгү,
Эң-не эргим шаңналым-дыр.
/ Буян ЕНДАН.