Мээң черим
Хектер эдер чайгы өйде
Хемчиим арыы таан чараш.
Кедээзинде Кызыл-Тайгам
Хереп алган таан чоргаар.
Ээр Хемчиим эриктерин
Эргеледип суйбап чыдар
Элезинниг, изиг оъттуг
Эргим черим Баян-Талам.
Баян-Талам бажын көөрге,
Маңнык торгу чаткан ышкаш.
Дүвүреңниң ховулары
Дүдүскектеп чыткан ышкаш.
Эдээнейде аалдар хонган
Ээр-Хаваам ыдык черим
Калбак шыгын малы оъттаан
Хая-Бажы чайлагларым.
Арбай, тараам чаагай үнер
Ак-ла-шадым, Сыын-Чүрээм
Арбын малым кыштаглары
Өзен-Оруум, Кадыр-Оруум.
Амыдырал чаяакчызы
Ажыл-ишчи мээң чонум
Үе-биле деңге базып,
Улам хөгжү Баян-Талам.
Нина КУУЛАР.
Баян-Тала суур.
Хүлүмзүрүү
Чуртталганың чараш шинии
Чайгаар оңуп, эстип бар чор.
Амыдырал бизеңинде сезен харны
Арта базып эртер үе келди.
Эгин кожа чурттаан ынаам
Эргим чараш хүлүмзүрүү
Сеткилимде муңгаралдан
Чечек үндүр чылыдыпты.
Ай, хүн адаа өртемчейге
Аас-кежик тарып чурттаар
Хуу-салым бисте бар деп
Хүлүмзүрүү сөглеп турду.
Бараат ДЕЛЕГ-ООЛ,
Бай-Тайга кожуун.
Хомуданчыын
Ынак мен деп сөзүң сөглээш,
Ымзандыргаш чоруй бардың.
Саймааралга алзыр кылдыр
Салым багы саарылды.
Куюмналган сеткилимни
Куспактап чылыдып кээр
Ховар куш бооп хуула бергеш,
Холуң сунуп келириң кай.
Өске кижиниң эжи болуп,
Өжүр баскан ынакшылың
Ырак дээрден кыйгы салбас,
Ыстап келир хомуданчыын.
Сандю ТЮЛЮШ.
Сүт-Хөл кожуун.
"Шын" №65, 2023 чылдың сентябрь 2.