ЫРЛААР-ИРЕЙ
Чашкы шаамның кудумчузу
Чавыт, эрги кажаалар дег,
Бора-бүдүн доорбаш-ыяш
Борбак-борбак бажыңнарлыг.
Ынчалза-даа оон артык
Эргим, төрээн булуңум чок:
Ынакшылым, чоргааралым,
Эжим-өөрүм ораны-дыр.
Хөй-ле чылдар эрткен-даа бол,
Амдыы чаа дег сакты бээрим,
Хөглүг-баштак Ырлаар-Ирей
Аңаа чурттап чораан чүве.
Чайын боорга үргүлчү-ле
Сай-Суу эрии хөлбең шыкка
Өшкү-хоюн дозуп чоруур,
Өөрүм оолдар аңаа баар бис.
Күжүр ирей бистиң-биле
Хүрежир дээш, девип үнер.
Көктүг шыкка чарыштырып,
Хөөктүрүп ойнаткылаар.
Буурул баштыг, даянгыыштыг,
Буян-чолдуг Ырлаар-Ирей
Хоюг-өткүт үнү-биле
Кожамыктап бадыргылаар.
Ыңай-хензиг үелерим
Ырлаар-Ирем ачызында
Доозун ышкаш эсти бербээн,
Тоолзуг солун сагындырар.
28.04.23
Буян ЕНДАН.
КЕЖИКТИГ САН
Айдың дүне чайнап турар
Тос дээрим, Долаан бурганым.
Аякта шайым үстүн чажар
Тос карак – мээң тыва эдилелим.
Азыраан малым шупту
Тос янзы чүзүннерлиг.
Ак шаң-биле мени бүргээш,
Доңурупкан тос тостуң соогу.
Ажы-төлүм “шаңнап” берген,
Тос чараш уйнуктарым,
Амыдыралчы салгалдарым
Тос кызыл меңгилерлиг.
Тоолчургу уткалыг
Тос тос – кежиктиг сан.
Раиса ХОВАЛЫГ,
ТР-ниң чогаалчылар эвилелиниң кежигүнү.
«Шын» №78 2023 чылдың октябрь 14