* * *
Хензиг чашты чаяап төрээш, азырап каан,
Херелденген хүннүң чырыын биске шаңнаан,
Хевим дыдыын хензиг када иле соп бээр,
Хөңнү чазык, хөглүг чаңныг, мээң авам.
Аъжы-чеми кезээде-ле изиг турар,
Ажы-төл дээш кара дерин төп-ле чоруур,
Авам ышкаш, делегейде деңнепки дег,
Авыралдыг кижи черле тывылбас-тыр.
Шара чашты шаан төндүр аадып чайгап,
Шаптараазын, бергелерге торулбайн,
Кижи кылдыр могаг чокка өстүргештиң,
Кичээнгейин хензиг безин кошкаш кылбас.
Өглүг-баштыг ада-ие болурга-даа,
Оглу, кызын, ам-даа чаш дег, сагыш човаар.
Ажы-төлүнүң ажы-төлүн алчып-тутчуп,
Ажаанзыраар алдын холдуг ынак авам.
Мээң авам – делегейнин дээдизи-дир,
Мээң авам – меңги харның арыы дег-дир.
Мээң авам – ай дег, хүн дег, чылыг, чырык,
Мени чаяап бодараткан Бурганым-дыр.
/ Кара-Уруг ШАРАП.
Улуг-Хем кожуун, Хайыракан суму.
ҮНЕЛИИН ААР!
Херелдиг хүн хүлүмзүрүп чайнап турда,
Хүннээректиг чылыг черниң экизин аар!
Эртен эрте үнген хүнге частып чоруур
Энерелдиг чуртумайның магалыын аар!
Орай дүне айның чырыы чайнап турда,
Октаргайда сылдыстарның онзазын аар!
Өрү дээрде бурган биске чаяап берген
Өртемчейде чуртталганың эргимин аар!
Чурукчунуң чуруп бижип сиилбээни дег,
Чурумалдыг черивистиң чаражын аар!
Чайыры чок бөдүүн-даа бол, кежик долган
Чырык черде чуртталганың үнелиин аар!
/ Роланда ШАВЫ.
Иркутск хоорай.
АВА ХЕМ
Чечек-чимис, оът-сиген чаагай чыды
Черже, дээрже айдызалдыр тарап турда,
Каа-Хем, Бии-Хем каттышкан белдиринге
Хайыралыг ие кижи хуулгаазын бооп төрүттүнген.
Амыдырал чаяакчызы ава кижи
Аржаан суглуг ийи хемниң белдиринге
Ажы-төлдү бодарадып, чаяап каарга,
Ава хемни Эне-Сай деп чону адаан.
/ Нина КУУЛАР.
Баян-Тала суму.
“ЧЕТКИЛЕР”
Амгы шагның депшилгелиг үезинде
Ажы-төлдү алаактырар “четки”-ле хөй.
Интернетке – иезинден изиг ынак,
Айфон – адазындан артык эргим.
Шак-ла ындыг “четкилерниң” салдарындан
Чаңгыс кызын ава кижи өпейлевес.
Ада кижи ажы-төлүн кижизитпес,
Ажыл-ишке бичиизинден ижиктирбес.
/ Мая ОНДАР.
Мугур-Аксы суур.
“Шын” №24 2025 чылдың июнь 26