ТЫВЫЗЫКСЫГ ХӨӨМЕЙ
Хөөмейивис, сыгыдывыс
Бөмбүрзекти дескиндир,
Черниң, дээрниң аразында
Челээштелдир чаңгыланды.
Чүглүг куш дег ужугуп,
Сүлдевисти бедидип,
Эткир хөөнү, аялгазы
Эътте-сөөкте сиңип каан.
Хөй-ле чоннар делегейде
Хөөмейивис алгап туру.
Тыва кижи сыгыды дег,
Тывызыксыг чүве чок-тур.
Тараа ОССУР, Тээли суур.
ИЕМ ЧУРТУ
Иргиттерниң сайгырак дег хонаштары
Ием чурту оъттуг, шыктыг болбас ийикпе.
Иштии-даштыы шынааларлыг чайлагларда
Инек, хойлуг, сарлык малдыг эвес ийикпе.
Дүдүскекти чайынналчак богаа кылган
Түрлүг бедик тайга-сынныг болбас ийикпе.
Ием чурту иштик болгаш, ындыг чоор бе,
Итпек-хойтпак савазыраан көвей ийикпе.
Бараат ДЕЛЕГ-ООЛ,
Бай-Тал суур.