«Өг-бүле» национал төлевилелде кирип турар «Өг-бүлеге деткимче» федералдыг төлевилел-биле 2026 чылда өөредилге инфраструктуразын экижидеринче угланган элээн каш чугула хемчеглерни боттандырар. Бо хемчеглерни акшаландырарының кол дөзү федералдыг бюджеттен болур.
Тыва Республиканың Өөредилге яамызының дыңнадыы-биле алырга, Кызыл хоорайның «Вавилинский» микрорайонунда 280 олуттуг амгы үениң школа назыны четпээн өөредилге албан чериниң тудуу 2027 чылдың төнчүзүнге чедир уламчылаар.
Оон аңгыда Кызыл-Мажалык суурда 110 уругга санаан «Чечек» муниципалдыг каттышкан хевирниң уруглар садының комплекстиг септелгези база эде дерилгези планнаттынган. Ол төлевилелдер езугаар албан чериниң материал-техниктиг баазазын чаартып, ол ышкаш чаа эт-септи болгаш амгы үениң өөредилге дериг-херекселдерин садып алыры көрдүнген.
Чеди-Хөл кожууннуң Ак-Тал суурда 60 уруг хүлээп алыр «Артыш» уруглар садынга улуг септелге ажылдары планнаттынган. Оон аңгыда школа назыны четпээн уруглар албан черин чаа эт-сеп база дериг-херекселдер-биле дериир.
Ол бүгү төлевилелдер Россия Федерациязының Чырыдыышкын яамызы биле Тываның Чазааның аразында чарган федералдыг бюджеттен субсидия бээриниң дугайында дугуржулгазынга даянган «Өөредилге хөгжүлдези» күрүне программазы-биле боттанып турар.
2025 чылда «Профессионалитет» база «Өг-бүлеге деткимче» деп чаа национал төлевилелдерниң күүселдези эгелээн. Бо төлевилелдер боттандырыышкыны-биле республикада школа назыны четпээн болгаш ортумак өөредилге объектилеринге капитал септелге ажылдарын кылыры чедингир апарганын демдеглезе чогуур.
2019 чылдан 2025 чылга чедир Тывада 10 муң хире олуттуг 14 чаа школалар туттунганын сагындыраал. Ооң-биле чергелештир эде чаартылга программалары-биле 2022 чылдан бээр 53 школаны бүрүнү-биле септеп чаарткан.
ТР-ниң Чазааның парлалга албаны.