Тываның улустуң чогаалчызы Мария Күжүгет
НОЯН
Шыдырааның нояны мен.
Шыыраамны көрүңерем.
Мерзе, терге, теве суглар
Мени дээнде тынын-даа бээр.
Карпов-даа, Каспаров-даа
Кадагалап, камнап ойнаар
Шыдыраамның нояны мен.
Шыырак-ла эргелиг мен.
МЕРЗЕ
Шыдырааның мерзези мен.
Шыырактарның бирээзи мен.
Көъжүм хостуг, амыр болгаш
Хөлзедиптер аргалыг мен.
Хамык өөрүм ачызында
Халдап киргеш, тиилежир мен.
ТЕРГЕ
Бодаларның эң-не улуу
Бодум бо мен. Терге-дир мен.
Дидим болгаш көжеримде,
Диттип чадап олурбас мен.
Дорттап халдап кирипсимзе,
Дораан шалап дүжүрер мен.
Ноюрзаар-даа харыы чок боор
Ноян хөөкүй матка орар.
АЪТ
Халдаарымда, даалыктаар,
Катап дедир хоя-даа бээр,
Көжүм кажар, ыргак-дагыр
Хөлчок маңгыр бода мен мен.
Мерзе, ноян төрелдерниң
Мен чок болза, күжү эвээш.
Дузааргаамдан, төрелзээмден
Тура дүшпес бода боор мен.
ТЕВЕ
Шынап тиилээр бодазыңза,
Шыдыраага бодал херек,
Шала шавый узак көштен
Чаңгыс бодааш, кылыпсыңза,
Дужааш халдааш, саат чокка
Тулап тургаш, тиилежир мен.
Теве мал дег маажым, топтуг
Дендии ховар бода-дыр мен.
ООЛ
Ол-ла бүгү бодаларның
Онза бичии хеймери мен.
Теве, терге, аът суглар
Девидээрге, доза турар –
Көөрүңге, ынай-даа бол,
Көрүштүг мен, ойнаштыг мен.
Оол мен чок болзумза-ла,
Оюнуңар оюн болбас.
“Шын” №42 2025 чылдың октябрь 30