Буян-Бадыргы Буянович Буянды Мөңгүн-Тайга кожууннуң Мугур-Аксы сумузунуң 1 дугаар ортумак школазын 2021 чылда дооскаш, шериг албан-хүлээлгезин Кемерово хоорайга эрттирген. Албан-хүлээлгезин эрттирип тургаш, пулемётчик-адыгжы мергежилди ол шиңгээдип алган.
Шериг албан-хүлээлгези дооступ, чанарынга чедир санныг хонуктар арткан турда, тускай шериг операциязын чуртка чарлаптарга, керээ чарып алгаш, шериг албан-хүлээлгезин уламчылаар деп Буянды шиитпирлээн.
Буян-Бадыргының эң-не баштайгы тулчуушкуну Украинаның Харьков облазының Балаклея хоорайның чоогунга, ТШО эгелээнден бээр үш дугаар хонуунда болган. Шериг албан-хүлээлгезин эрттирип тургаш, шиңгээдип алган арга-мергежили аныяк солдатка кончуг ажыктыг болган. Тулчуушкун үезинде пулеметчик Буянды снайпер оду-биле дайынчы эштерин дуглап, элээн каш дайзынны узуткаан. Түңнелинде, кончуг шыырак белеткелдиг украин солдаттарның камгалалынга быжыглаттынып турар черин ол-ла хүн эжелеп апканнар.
Ооң соонда Буян-Бадыргы Изюм хоорайга болган тулчуушкуннарга өскелерден ылгалып, эрес-дидим чоруун чаңгыс эвес удаа көргүскеш, күрүне шаңналын алган.
2022 чылдың март 26-да эрес-дидим пулеметчик аажок күштүг артиллерийжи боолаашкынга таварышкан. Медерелин ышкыныпкан Буян-Бадыргыны дайынчы эштери тылга эккелген. Санкт-Петербург хоорайга шериг госпиталының эмчилери Буян-Бадыргыга бажы кемдеп, берттинген деп диагнозту салган. Эмчи комиссиязы аныяк дайынчының кадыкшылын шинчип, өөренип көргеш, улаштыр шеригге албан-хүлээлге күүсетпес дугайында шиитпирни үндүрген.
2022 чылдың апрель айда Буян-Бадыргы чанып келген. Өг-бүлелиг, чаңгыс кыстыг.
РФ-тиң Президентизиниң 2022 чылдың май 3-те үндүрген Чарлыы-биле күрүнени маадырлыы-биле камгалааны дээш рядовой Буян-Бадыргы Буянды Суворов аттыг дайынчы медаль-биле шаңнаткан.
Күрүне шаңналы дыка үр үениң дургузунда бодунуң маадырын тыппайн, чыдып-чыдып, 2023 чылдың декабрь 30-де тып чедип келген. Мөңгүн-Тайга болгаш Өвүр кожууннарның шериг комиссары Ролан Маадыр Мөңгүн-Тайга кожууннуң төп культура одаанга дайынчының дөргүл-төрели, чаңгыс чер чурттугларының мурнунга, байырлыг байдалга тывыскан.
ТР-ниң шериг комиссариадының медээзи-биле А. ОНДАР белеткээн.
Чурукту маадырның архивинден алган.
«Шын» №7 2024 чылдың январь 31
