Петербургтуң бүгү делегей чергелиг экономиктиг шуулганының сөөлгү хүнүнде «Россия — шыдал-шинектерниң чурту» деп президентижи төлевилелдиң “Мээң чуртум – мээң Россиям” деп Бүгү-россияның 20-ги мөөрейниниң тиилекчилерин шаңнаар езулал болган. Тиилекчилерниң аразында Тываның күрүне университединиң студентилери Милена Донен биле Аржаана Сүүр-оол олар база бар.
2023 чылда “Мээң чуртум – мээң Россиям” деп мөөрейге Россияның 89 регионундан болгаш 25 кадагааты чурттан 100 муң ажыг кижи киришкен. Россия Федерациязының Президентизи Владимир Путин сөс ап, чыылганнарга байыр чедирген.
Тываның күрүне университединиң студентизи Милена Донен “Мээң чоргааралым. Мээң төрээн черим” деп номинацияга “Ширтекте хээлер” деп төлевилели-биле 2-ги черни ээлээн. Ооң төлевилели өг-бүлениң эргижирээн ус-шевер ажылын чоннуң ортузунга нептередиринче угланган. «Кидис шөер ажылдар мал ажылын хөгжүдеринге, улустуң ажыл-агыйлыг болурунга дузалаар. Бодунуң төөгүзүнге, езу-чаңчылдарга хумагалыг болурун кижизидер” — деп, Милена Донен демдеглээн.
Тываның күрүне университединиң база бир студентизи Аржаана Сүүр-оол «Регионнарның хамаатыларының амыдырал байдалын экижидери-биле чургайлыг хүрээлел” деп номинацияга база 2-ги черни ээлээн. Ол “Төөгүге тырттырып аалы” деп төлевилелди саналдаан. «Бистиң төлевилеливистиң кол сорулгазы – назыны улгады берген улусту ниитилелдиң амыдыралынга киириштиреринге дузалаары болур, ону фото уран чүүлдүң дузазы-биле ажыдып болур”— деп, ол чугаалап турар.
“Мээң чуртум – мээң Россиям” деп Бүгү-российжи мөөрей студентилерниң эгелээшкини-биле 2003 чылда Рязань хоорайга төрүттүнген. 20 чылдың дургузунда аңаа 600 муң ажыг кижи киришкен.
А. ХЕРТЕК белеткээн.
"Шын" №46 2023 чылдың июнь 24
