Удавас февраль 10-да, Шагаа байырлалында, Улу чылы моорлап келир. Шагаа байырлалын уткуштур тускай шериг операциязында чаңгыс чер чурттугларывысче чорудар чүъктү 2024 чылдың январь 9-тан эгелеп, чон эккеп эгелей берген.
Бүгү-российжи улусчу фронтунуң ТР-де салбырының удуртукчузу Саима Далчин:
– Бөгүн Шагаа байырлалынга уткуштур гуманитарлыг чүъктү чыып эгелей бердивис. Февраль айның эгезинде беш тонна чүък чүдүрер улуг автомашина Тывадан аъттаныптар. Чылыг хептер болгаш суугуларны, оран-саваны электри-биле чылыдар херекселдерни, генераторларны, дроннарны, караңгыда тырттырар видеокамераларны болгаш эътти чорудары планда көрдүнген.
Январь 9-та Шагаа акциязы ажыттынары билек-ле, организациялар гуманитарлыг дузазын эккеп эгелей берген.
«Республиканың Роскадастр албан чериниң ажылдакчылары, коллектививис-биле бир дугаар эвес, а ооң мурнунда база черле дузаламчыны чорудуп турган бис. Коллективтиң чыгган акшазы-биле дайынчыларның чагыын езугаар караңгыда көөр видеохерекселди садып эккелдивис. Тускай шериг операциязында дайынчыларывыска тура-сорукту, күчү-күштү күзедивис» – деп, Тывада Роскадастрның директору Леонид Дамдын чугаалады.
«Кыска үениң дургузунда акша-төгерикти чыггаш, бистиң хереглээнивис дериг-херекселди садып эккелгеш, хүлээдип берди. Бис дээш сагыш човап турар чаңгыс чер чурттугларывыска өөрүп четтиргенивисти илередир-дир бис» – деп, ТШО-нуң киржикчизи Милан Дагбы чугаалады.
ТР-ниң улустуң артизи, В. Көк-оол аттыг Национал хөгжүм-шии театрының кол режиссеру Леонид Каң-оол:
– Театрның өмүнээзинден «Бүгү чүүлдү тиилелгеже!» деп кыйгы-биле актерларның болгаш өске-даа ажылдакчыларның өмүнээзинден «Далайга дамды дуза» дээш, кылган ажыл-иживистиң артыкшылы-биле караңгыда чырык болзун дээш, дайынчы кижиге «карак» болур амгы үениң тускай дериг-херекселин эккелдивис. Мында ноутбук, адаптерлер, видеохайгаарал, дроннар, смартфон, четки фильтри дээш дайынчыларга эргежок чугула амгы шагның дериг-херекселдери бар. Ону камгалакчыларывыска хүлээдип турарывыс бо.
Ада-чурттуң Улуг дайыны болуп турда, Кызыл-кош чаңгыс-даа хүн тура дүшпейн, ажылдаанын билир бис. Төрээн чериниң камгалакчыларынга дуза катпас тыва кижи черле чок деп бодаар мен. Ынчангы дег бо хүннерде база кым-даа кыдыынга көрүп олурбас боор оң. Дайын шөлү барып шыдавас улус акша-төгерик-биле, даараан хеви, кылган херексели-биле дээш кижи бүрүзү шыдаар-ла шаа-биле дузалаар ужурлуг. 1945 чылда тиилээнивис дег, ам база тиилелге бистии болур. Чүге дээрге чуртту кым-даа шилип албас, төрүттүнген черин камгалаары кижи бүрүзүнүң хүлээлгези-дир.
Шагаа таварыштыр чедирер гуманитарлыг дузаны Кызыл хоорайның Дружба кудумчузунда «Норзин» садыг-саарылга төвүнде болгаш Кызыл Партизаннар кудумчузунуң 30 дугаар бажыңында хүлээп эгелей берген дээрзин сагындыраал.
Айдың ОНДАР.
Буян ООРЖАКТЫҢ тырттырган чуруктары.
«Шын» №1 2024 чылдың январь 10
