РФ-тиң болгаш ТР-ниң бедик күрүне шаңналдарын Россияның болгаш Тываның хөгжүлдезинге, аныяк-өскенниң кижизидилгезинге, өг-бүлениң үнелиг чүүлдерин кадагалап арттырарынга улуг үлүүн киирген кижилерге болгаш өг-бүлелерге байырлыг байдалга тыпсырының ёзулалы Шагаа бүдүүзүнде Тываның Чазааның бажыңынга болуп эрткен.
Тургузукчу күш-ажылдың болгаш өг-бүлениң ыдыктарының чылының эгезинде, кызыл Аът чылының Шагаазының бүдүүзүнде күш-ажылга шылгараан, ада-иениң буянныг чолун бот-боттарынга ынакшыл, ажы-төлдү кижизидип өстүрери-биле бадыткаан хоочуннарга бедик шаңналдарны тыпсыры моон-даа бурунгаар ак орукту йөрээниниң демдээ-дир деп, Тываның Баштыңы Владислав Ховалыг шаңналдарны тыпсырының ёзулалының үезинде чугаалаан.
Россияның Президентизи Владимир Путинниң Чарлыы-биле “АДА-ЧУРТТУҢ МУРНУНГА АЧЫ-ХАВЫЯАЗЫ ДЭЭШ” МЕДАЛЬ ОРДЕННИҢ” I ЧЕРГЕЗИ-БИЛЕ “Россияның юристер ассоциациязы” Бүгү-российжи хөй-ниити организацияның Тыва Республикада салбырының баштаар чериниң даргазы Артур Маадырович МОНГАЛДЫ шаңнаан.
Тываның Баштыңы Владислав Ховалыгның Чарлыы-биле дараазында шаңналдарны эң төлептиглерге тывыскан:
“ТУСКАЙ ШЕРИГ ОПЕРАЦИЯЗЫНЫҢ КИРЖИКЧИЗИ” ТУРАСКААЛ МЕДАЛЬ-БИЛЕ Тыва Республикада ажыл-чорудулганың чамдык хевирлерин лицензиялаар болгаш хайгаараар талазы-биле албанның удуртукчузунуң оралакчызы Иван Константинович МОҢГУШ;
“ТУСКАЙ ШЕРИГ ОПЕРАЦИЯНЫҢ КИРЖИКЧИЗИ” ТУРАСКААЛ МЕДАЛЬ-БИЛЕ Росгвардияның Тыва Республика талазы-биле эргелелиниң тускай сорулгалыг дүрген хөделир “Адыг” мотовзводунуң полицейжизи, полицияның прапорщиги Айдаш Владимирович Чооду;
“ТЫВА РЕСПУБЛИКАНЫҢ КАДЫК КАМГАЛАЛЫНЫҢ АЛДАРЛЫГ АЖЫЛДАКЧЫЗЫ” атты кадык камгалалының хоочуну Майя Сарыг-ооловна Базыр-оол;
“ТЫВА РЕСПУБЛИКАНЫҢ АЛДАРЛЫГ АРТИЗИ” атты Хөгжүмнүң болгаш танцының Тываның национал ”Саян” театрының балет артизи Валентина Докпаковна Биин-оол;
“ТЫВА РЕСПУБЛИКАНЫҢ ӨӨРЕДИЛГЕЗИНИҢ АЛДАРЛЫГ АЖЫЛДАКЧЫЗЫ” атты Шагаан-Арыг хоорайның № 2 “Сказка” уруглар садының кижизидикчи башкызы Зоя Александровна Саянова;
“ТЫВА РЕСПУБЛИКАНЫҢ АЛДАРЛЫГ АЖЫЛДАКЧЫЗЫ” атты кызыгаарлаан харыысалгалыг “Орук-тудуг транспорт” ниитилелиниң директору Владимир Петрович Макшанов;
“ТЫВА РЕСПУБЛИКАНЫҢ АЛДАРЛЫГ БАШКЫЗЫ” атты Сүт-Хөл кожууннуң Тыва эки турачылар аттыг Суг-Аксы ниити билиг школазының эге класстар башкызы Роза Александровна Ондар;
“ТЫВА РЕСПУБЛИКАНЫҢ КУЛЬТУРАЗЫНЫҢ АЛДАРЛЫГ АЖЫЛДАКЧЫЗЫ” атты Чөөн-Хемчик кожууннуң Мерген-Херел Моңгуш аттыг культура бажыңының кинотеатр талазы-биле кол администратору Альберт Сүге-Маадырович Кара-Сал;
“ТЫВА РЕСПУБЛИКАНЫҢ ӨӨРЕДИЛГЕЗИНИҢ АЛДАРЛЫГ АЖЫЛДАКЧЫЗЫ” атты Барыын-Хемчик кожууннуң администрациязының өөредилге эргелелиниң методизи Елена Окал-ооловна Хертек;
“ТЫВА РЕСПУБЛИКАНЫҢ КӨДЭЭ АЖЫЛ-АГЫЙЫНЫҢ АЛДАРЛЫГ АЖЫЛДАКЧЫЗЫ” атты Тываның ветеринария лабораториязының бактериология салбырының ветеринар эмчизи Урана Кушкаш-ооловна Сарыглар;
“ТЫВА РЕСПУБЛИКАНЫҢ АЛДАРЛЫГ ЭНЕРГЕТИГИ” атты ТЭК-4 башкарыкчы компанияның чиңгине директорунуң техниктиг айтырыглар талазы-биле оралакчызы– кол инженери Николай Ооржакович Данзы;
“ТЫВА РЕСПУБЛИКАНЫҢ ӨӨРЕДИЛГЕЗИНИҢ АЛДАРЛЫГ АЖЫЛДАКЧЫЗЫ” атты Тес-Хем кожууннуң өөредилге эргелелиниң комплекстиг айыыл чок чорук талазы-биле методизи Римма Кунгааевна Соян;
“ӨГ-БҮЛЕНИҢ ҮНЕЛИГ ЧҮҮЛДЕРИН КАДАГАЛААНЫ ДЭЭШ” ТЫВА РЕСПУБЛИКАНЫҢ МЕДАЛЫ-биле улус өөредилгезиниң хоочуннары Алдын-оол Сендинович Сундуй биле Долум Даңзы-Белековна Сундуй;
Көдээ ажыл-агыйның хоочуну Александр Тас-оолович Тумат биле Тес-Хем кожууннуң төп эмнелгезиниң эмчи сестразы Людмила Николаевна ТУМАТ.
Россияның болгаш Тываның бедик шаңналдарынга төлептиг болганнар, оларның кызымак күш-ажылын үнелээни дээш өөрүп четтиргенин республиканың удуртулгазынга, кады ажылдап чораан эш-өөрүнге илереткеннер. Олар Тываның Баштыңы Владислав Ховалыг-биле чурукка тырттырып алганнар.
Ш. МОҢГУШ.
Чиңгис СААЯНЫҢ тырттырган чуруу.
“Шын” №6 2026 чылдың февраль 19
