Шагаа чемин буу-хаа далаш,
Чаңгыс-ла хүн кылып аар бе?
Чаглыг эъттиң, элбек чемниң
Чажыды чүл, чымыжы чүл?
Шагаа хүннүң байлак чемин
Чайдан, күстен белеткей бээр.
Шыдал-шинек шаа-биле
Чыгдынып ап, кылып алыр.
Малдың сүдү, божа-хойтпаа
Магадылал ында болур.
Ак чем аймаа – дээжилерни
Ала чайны өттүр кылыр.
Ак сүт үстү өремеден
Аажок үскүр саржаг кылгаш,
Сыңыйларга, хырыннарга
Чык долдур куткулап каар.
Ажыг хойтпак божазындан
Ааржы чадып, кургадып аар.
Куруттарны чүңге дискеш,
Кургадып аар, кадырып аар.
Хайынган сүт, божаның суу
Каттышканда быштакталыр.
Базырыктааш, салып каарга,
Баскан быштак оон-на бүдер.
Кадыргаштың, өл-шык дээспейн,
Кадагалап, шыгжап алыр.
Баскан быштак, шөйген быштак –
Магалыг ак курлавыр чем.
Саан-сава ажылынга
Салымныг-ла чаяаттынган,
Хойтпак-сүттен чемнер кылыр
Холу чемзиг ава чонум.
/ Осур-оол Монгуш.
Чурукту интернеттен хоолгалаан.
“Шын” №5 2026 чылдың февраль 12