Тускай шериг операциязында киржип турар дайынчыларывыска ээлчеглиг дуза чедирилгези уламчылавышаан. Шагаа байырлалынга уткуштур ачы-дуза чедирер акция январь 9-та-ла ажыттынган соонда, республиканың сагыш човангыр чурттакчы чону, албан черлери ачы-дуза чыылдазын эгелей берген.
Январь 25-тиң хүнүнде Садыг-үлетпүр палатазы квадроциклди бистиң дайынчыларывысче чорудары-биле “Ада-чурттуң камгалакчылары” күрүне фондузунга дамчыдып берген. “Шериглеривистиң чагыы ёзугаар бо квадроциклди 200 тонна чүдүрер улуг машинага өске-даа чугула херек чүүлдер-биле кады чедирер бис” – деп, Бүгү-российжи улусчу фронтунуң ТР-де салбырының удуртукчузу Саима Далчин чугаалаан.
Ол ышкаш "Чаңгыс демниг Россия" партиязының херээженнер шимчээшкини база бүдүн Газель ишти чылыг хептерни, техниканы, газ-биле ажылдаар горелкаларны, баллончиктерни, камгаланыр четкилерни эккелген. Улусчу фронтудан база чурттакчы чоннуң чыгган бүдүн машина ишти чылыг хептерин, аъш-чемин база дамчыткан.
Чаңгыс чер чурттугларывыстың Улусчу фронтунуң, "Чаңгыс демниг Россия" партиязының баазаларынга чыгган ачы-дузазын “Ада-чурттуң камгалакчылары” күрүне фондузунда мөөңнеп чыып турар. Ону февраль 1-де чүдүргеш чорудуптарга, Шагаа хүнүнде дайынчыларывыска чеде бээр. Гуманитарлыг чүъктү чедирери-биле Таңды кожууннуң 5 тоннаның болгаш Садыг-үлетпүр палатазының бергени 20 тоннаның машиналары чоруур.
"Чаңгыс демниг Россия" партиязының күүсекчи комитединиң удуртукчузу Айдыс Ооржак ук партияның кежигүннери, хууда сайгарлыкчылар, национал диаспоралар болгаш сагыш човангыр чон ТШО эгезинден тура гуманитарлыг дуза чыылдазынга идепкейлиг киржип турганын демдеглээн: “Чүгле шак мынчаар демнежип тургаш, тиилелгени чедип алыр бис. Кызыл кожуунда салбырның гуманитарлыг дузазын база бөгүн мында эккелдивис”.
Сагыш човангыр чаңгыс чер чурттугларынга, "Чаңгыс демниг Россия" партиязынга, республиканың бүгү-ле кожууннарында салбырларга, кожуун чагыргаларынга ачы-дуза чедирилгезинге идепкейлиг киржилгези дээш ТР-ниң Дээди Хуралының (парламент) депутады Эрес Хуурак четтиргенин илереткен. Шагаа акциязы-биле чыгдынган гуманитарлыг чүъктү Тываның Чазааның төлээзи Тимур Куулар база Эрес Хуурак олар чедирип чоруур. Кожууннардан гуманитарлыг дуза чорудар тускай чурумну тургускан. Бо удаа Кызыл болгаш Таңды кожууннар база Көдээ ажыл-агый яамызы ниитизи-биле 9 тонна эътти чыгган. Чыгдынган хой, инек, аът эъттерин база өске-даа чүүлдерни чүгле 55-ки гвардейжи мото-адыгжы (даг) бригаданың эвес, а өске-даа шериг кезектеринде Тываның дайынчыларынга база чедирерин Эрес Хуурак демдеглээн.
Чыжыргана СААЯ.
Ада ТЮЛЮШТУҢ тырттырган чуруктары.
«Шын» №6 2024 чылдың январь 27
