Улусчу фронтунуң күүсекчи комитединде Шагаа мурнунда тускай шериг операциязының киржикчилеринге гуманитарлыг дуза чыылдазы эгелээн. Амгы үеде дайынчыларның чагыглары ёзугаар генераторлар, чылыдар пушкалар, чылыг идик-хеп, чажыртынар четкилер, доңурган эът дээш оон-даа өске чугула херек чүүлдерниң чыылдазы чоруп турар.
Улусчу фронтунуң Улусчу полугунуң волонтёрлары кижи бүрүзүнге херек чүүлдерни аңгылап, хаптап турар. Бир хаптың иштинде чаштынар четкилер, волонтёрларның боттарының аргааны чылыг уктар, дайынчыларның чер-чуртунче онча-менди ээп келиринге идегээн сагыш-сеткили-биле даараан чоорганнары, чеңи-чоктары бар. Тыва Республиканың Садыг-үлетпүр палатазының эвилели амыдыралга кончуг ажыктыг бензин-биле ажылдаар 3 кВт күштүг генераторну дамчыдып берген.
“Бо бензин-биле ажылдаар генераторга бистиң дайынчыларывыс телефоннарын болгаш дроннарның аккумуляторларын "чемгерип", харын-даа электри-биле ажылдаар хөнекти-даа кожуп алыр аргалыг болур. ТШО эгезинден тура шериглеривиске идепкейлиг дузалажып, чаңгыс эвес удаа чугула херек дериг-херекселдерни саткаш, чорудуп турар бис” – деп, Тыва Республиканың Садыг-үлетпүр палатазының эвилелиниң кежигүнү Дмитрий Черевко чугаалаан.
14 кижиден тургустунган волонтёрлар отрядында янзы-бүрү мергежилдерниң кижилери субботаларда болгаш ажыл хүннериниң соонда ажылдап турарын Улусчу полктуң волонтёру Аясмаа Далаа дыңнаткан. Ооң мурнунда ол этноковоркингиге хөректээштер болгаш чылыг уктар даарап ажылдап турган. Шак ол дуржулгазы ачы-дуза чедиреринге база херек болган. “Кижи бүрүзүнге тускай хаптар чыырынга 64 чажыртынар четкини кылдывыс. Чеңи-чоктарны даарааш, оларның карманнарынга камгалал талисманнарны болгаш дайынчыларның хей-аъдын, сүлде-сүзүүн бедидер чүглүг сөстерни база саазынга бижээш, суккулап каан бис” – деп, ол чугаалаан.
“Чагыглар аразында аъш-чем аймаа киирбээн болганы-биле хүлээвейн турар бис. Ынчангаш колдуунда чылыг хептер, генераторлар, Шагаа байырлалында чаңчыл ёзугаар чорудар доңурган эът аймаан чыып турар. Республиканың бүгү-ле кожууннары гуманитарлыг дуза чыылдазынга идепкейлии-биле киржип турарлар” – деп, Улусчу фронтунуң парлалга секретары Даяна Тажи демдеглээн.
Ол ышкаш Тыва культура төвүнүң болгаш Камбы-лама эргелелиниң төлээлери база ТШО киржикчилеринге гуманитарлыг дуза чыыры-биле, кожууннарже чоруп турар. Ачы-дуза чыылдазын чорутпушаан, концерт программаларын болгаш номналдарны организастаар. Республиканың кожууннарынче үнүүшкүннер январь 30-ниң хүнүнге чедир үргүлчүлээр.
Тыва Республиканың Камбы-лама эргелелиниң төлээлери ТШО девискээринче база чоруур. Аңаа баргаш, дайынчыларга февраль 28-тен март 1-же дүне номналды эрттирер.
Дайынчыларның чагыгларын ёзугаар тускай даңзыны тургускан. Күзелдиг кижи бүрүзү Шагаа мурнунда ачы-дуза чыылдазынга киржип болур. Ынчалза-даа техника аймаан садарда, организакчылар-биле сүмележип алырын дилеп турар. Немелде айтырыглар бар болза, дараазында телефон дугаарынче долгааш, билип ап болур: 2-10-50.
Улусчу фронтунуң регионалдыг күүсекчи комитединиң оран-савазында гуманитарлыг дуза чыылдазы доктаамал ажылдап турар. Ооң адрези: Кызыл хоорай, Тыва эки турачылар кудумчузу, бажың 3. Ол ышкаш Цеченлинг хүрээзинде база ачы-дуза чыылдазын чорудуп турар.
Чыжыргана СААЯ.
Кара-Кат Хертектиң тырттырган чуруктары.
“Шын” №3 2025 чылдың январь 30









