Россияның шииткел күүседириниң федералдыг албанының Тыва Республика талазы-биле эргелелиниң регионда хоругдал албан черлериниң кижизидикчи ажылдакчылары Шагаа уткуштур хемчеглерни ап чорудуп турар. Ол дээрге лекциялар, беседалар болгаш тематиктиг мөөрейлер. Аңаа сарыг шажын чүдүлгезиниң ламаларын, Кызылда болгаш Шагаан-Арыг хоорайда хоругдал черлеринде өөредилге ажылын чорудуп турар кежээки школаларның башкыларын хаара туткан.
Кызылда “Цеченлинг” сарыг шажын хүрээзиниң ламалары Шагааның төөгүзүнүң, ооң кижиниң сагыш-сеткилинге болгаш мөзү-шынарынга эки салдарының, эзиртир болгаш угаан-сегээн ээдередир бүдүмелдерни ажыглаары кижиниң кадыынга болгаш угаан-медерелинге багай салдарының дугайында лекция, беседаларны эрттирип, мөргүлдерни номчааннар.
Кызылдың болгаш Шагаан-Арыгның кежээки школаларының башкылары болгаш хоругдал албан черлериниң кижизидикчи ажылдакчылары Шагааны уткуурунуң болгаш эрттирериниң ёзу-чаңчылдары-биле холбаалыг тайылбыр ажылын оюн-тоглаа хевирлеринге кеземче херээн эрттирип турар кижилерниң аразынга эрттирип турар. Шагаа хүнүнде хоругдал черлеринге от өңнүг кызыл Аът чылын уткуурунуң ёзулалдарын эрттирер. Тыва национал оюннарга маргылдааларны организастаар.
Бо хемчеглерге хоругдалда кижилер күзелдиг киржип турар.
/ Россияның шииткел күүседириниң федералдыг албанының Тыва Республика талазы-биле эргелелиниң парлалга албаны.
“Шын” №6 2026 чылдың февраль 19
