Тываның удуртукчузу Владислав Ховалыг тускай шериг операциязының киржикчилериниң чоруткан элээн каш видеоларын бодунуң телеграм-каналынга чырыткан. Дайынчылар фронтуга көргүзүп турар деткимчези дээш регионнуң удуртукчузунга болгаш республиканың чурттакчыларынга четтиргенин илередип турар. Тываның дайынчы хөделиишкиннер зоназынче чоруткан техникалары элээн каш чылдарның дургузунда бодунуң хүлээлгелерин чедиишкинниг күүседип турарын дайынчылар чугаалаан.
Шериг албанныглар видеоларының бирээзинде мындыг медээни бижиткен: «Владислав Товарищтайовичиге болгаш Тыва Республиканың чонунга улуу-биле өөрүп четтиргенивисти илередип тур бис. Силерниң дамчыткан техникаңар Краснолиманск угланыышкынында дайынчы даалгалар күүседиринге биске дузалажып турар. Силерниң республикадан келген техниканың техниктиг байдалы биске-даа база ниити сорулгаларга-даа силерниң харыысалгалыг болгаш шыңгыы хамаарылгаңарны херечилеп турар. Чыл ажыр бо техниканы үргүлчү ажыглап, сорулгавыс чедип алыр дээш, онаанган бүгү-ле даалгаларывысты күүседип тур бис. А ниити сорулгавыс чаңгыс – тиилелге бистиң болур!».
Владислав Ховалыг видеоларга хамаарыштыр мынчаар демдеглээн: «Бистиң маадырларывыстың сеткилинден четтиргенин илередип турар харыыларын алгаш, дыка өөрүүр мен». Республиканың шупту күрүне албан черлери, аңгы-аңгы организациялары, сайгарлыкчылар, бөдүүн чурттакчылар шупту ачы-дуза чыылдазында киржип турарын ол демдеглээн. Тывада ажылдыг улуг инвесторлар, бүдүрүлгелер база үлүүн киириштирип турар.
Тыва чурттуң шупту регионнары дег, тускай шериг операциязының баштайгы хүннеринден эгелеп Төрээн чурттуң камгалакчыларын идепкейлиг деткип келгенин баштың немээн. «Бистиң республика дайынчыларывыстың албан эрттирип турар аңгы-аңгы шериг кезектеринче болгаш угланыышкыннарынче: бирги хереглел барааннарын, техника, дроннарны, радиоэлектроннуг демисел херекселдерин, автомобильдер болгаш оон-даа өске гуманитарлыг чүъктү чорудуп турар» — деп, Владислав Ховалыг демдеглээн.
Ай санаашкыны-биле Чаа чыл – Шагаага уткуштур дайынчыларга гуманитарлыг дуза чедирер чаа акция чоокта чаа Тывада эгелээн. Февраль 10-га чедир кампания уламчылаар. Төрээн черинге Шагаа байырлалы – февраль 18-ке чедир организакчы- лар – бүгү Россияның Улусчу фронтузунуң регионалдыг салбыры база Тыва Республиканың Чазаа чүъктү чедирерин планнаан. Дайынчы хөделиишкиннер зоназынче 20 тоннаның, Донецк угланыышкынынче 5 тоннаның база Курск талазынче 5 тоннаның чүък машиналары аъттаныптар. Шупту чүъктүң ниити деңзизи 30 тонна болур.
Баштайгы посылкалар адрестеринче чедип эгелээн. Чижээ, республиканың Чер болгаш өнчү хамаарылгаларының яамызы генераторлар, рациялар база эът аймаан; суд системазының хоочуннары генераторларны; хуу сайгарлыкчы Валерия Калзан ийи «Баофенг» деп рацияны болгаш ийи «ТУТ» рацияны; Кызылдың чурттакчызы Роза Тумат «Вектор» деп ийи рацияны дамчыткан.
Чаа доңурган эът аймаан база гуманитарлыг дузаламчы кылдыр чорудары чаңчыл апарган. Дайынчыларга амгы үеде генераторлары, чылыдыр үрер пушкалар, рациялар, дроннар, дрон детекторлары, мотоциклдер болгаш автомашиналар дыка херек деп Улусчу фронт дыңнаткан.
Чоокку хүннерде муниципалитет бүрүзүнге Шагаага уткуштур улуг номналдар үезинде гуманитарлыг дузаламчы чыыр тус чер штабтарының активчилери-биле ужуражылгалар болуп эртер.
Россияның буддистер ассамблеязы, Тыва Республиканың Камбы-лама эргелели, К.Б. Ондар аттыг тыва үндезин культура төвү катчып алгаш, бо хемчеглерни организастаар. Ужуражылгалар үезинде тыва төптүң артистери оюн-көргүзүүн бараалгадыр, а Тыва Республиканың Камбы-лама эргелелиниң ламалары мөргүлдерни эрттирер.
Шагаа бүдүүзүнде дайынчыларга белектер чыырынга база ону дамчыдарынга күзелдиг кижи киржип болур. Улусчу фронтунуң күүсекчи комитединиң дараазында адресте Чүлдүм кудумчузу, 40а бажыңда база Ленин кудумчузу, 5 дугаар бажыңда Тываның күрүне университединиң #МыВместе деп штавында гуманитарлыг дуза чыылдазының пунктулары ажылдаар. Правобережная кудумчузунда 4 дугаар адресте көдээ ажыл-агый рыногунда эът аймаан хүлээп турар. Айтырыглар бар болза, 2-10-50 дугаарже долгааш, тодарадып болур.
/ А. МОНГУШ.
Буян ООРЖАКТЫҢ тырттырган чуруу.
“Шын №2 2025 чылдың январь 22
