Улуг-Хем кожуунда
Шагаан-Арыгда 60 хардан өрү назынныгларның «Сорунза» клувунга шай байырлалы болуп эрткен. Клубтуң кежигүннери шай байырлалын Алдар шөлүнге эртенги хайындырган шай өргүүр езулал-биле эгелээн. Өргүлдү тускай шериг операциязында дайынчыларга тураскаадып кылганнар.
Дараазында улуг назынныгларның клувунга "Эң чараш тос-карак", «Тыва үлегер домактар», "Эң сүүзүннүг, амданныг шай" деп мөөрейлер болуп эрткен.
Байырлалдың ийиги кезээнде Тываның чогаалчылар эвилелиниң кежигүнү, «Уйгу чок Улуг-Хем» чечен чогаал каттыжыышкынының чогаалчызы, шүлүкчү Олег Намчаның чаа үнген «Тайбың чечээ» деп номунуң таныштырылгазы болуп эрткен. Автор бодунуң бир дугаар номун таныштырып, тыва дыл болгаш тыва чогаал дугайында солун чугааны кылган.
«Сорунза» клувунуң кежигүннери Олег Намчаның чырыкче бирги номунуң үнгениниң өөрүшкүзүн үлежип, ук номда кирген шүлүктериниң аянныг номчулгазын кылганнар.
Чогаалчының кады ажылдап чоруур чогаалчы эш-өөрү: У.М. Аракчаа-Величко, А.М. Шыырап, Г.М. Бүрбүжүк база Улуг-Хем кожууннуң Херээженнер чөвүлелиниң удуртукчузу С.О. Тарыймаа чаа үнген номга үнелелди берип, авторга чогаадыкчы чаа шыпшыктарны, чайынналчак чедиишкиннерни, моон-даа соңгаар чаа-чаа чогаалдар бижиттинерин күзээннер.
Байырлалдың түңнелинде киржикчилер шайлаарының езулалын кылып, аяк шайны аартап ора ажыктыг чугаа-соодун солчуп, «Уйгу чок Улуг-Хем» чечен чогаал каттыжыышкыны база Херээженнер чөвүлели кады кылып чорудар ажылдарының дугуржулгазын кылганнар.
Улуг-Хем кожуун чагыргазының социал четкиде арнындан алган.
“Шын” №20 2025 чылдың май 29
