Октябрь 18-тиң хүнүнде Тываның Баштыңы Владислав Ховалыгның даалгазы-биле Орук-транспорт яамызы кышкы үеде хөй хар дүшкенинден оруктарга нарын байдал тургустуна бээр кожууннарның орук талазы-биле ажылдап турар албан черлеринге чаа техникаларны байырлыг байдалга берген. Оларга Мөңгүн-Тайга, Өвүр, Барыын-Хемчик кожууннар база “Туваавтотранс” хамааржыр.
“Тываның Баштыңы Владислав Ховалыгның даалгазы-биле база кышкы үеге белеткенири-биле орук ажыл-агыйларының техникаларын чаартып турарывыс бо. Кандыг-даа техника үези эртерге, үрелип, ажыглалдан үнүп эгелээр. Ынчангаш оларны солуп, чаа машиналарны садып ап турар бис. Ниитизи-биле 190 млн рубльди 14 тускай техника садарынче үндүрген. Ооң иштинче бөгүнгү дамчыдып турарывыс 4 техника база кирип турар” – деп, Тыва Республиканың орук-транспорт комплекизиниң сайыды Шораан Чыргал-оол чугаалаан.
Мөңгүн-Тайга кожуунга эрткен кыжын улуг хар чагганындан орук муңгашталып, аргыжылганы нарыыдадып турган. Агаар-бойдузунуң аайы-биле аңаа улуг хар болганчок дүжүптер. Ынчангаш “Дорожник” КХН-ге улуг күчү-күштүг грейдер кончуг херек. Албан черинде ниитизи-биле чаа алган техниказы-биле кады 1 ортумак, 2 улуг грейдер, 1 экскаватор, 1 каток, 1 погрузчик, 3 самосвал бар.
“Бистиң КХН эки ажылдап турарларның аразынче кирип турар. Ажылдакчыларывыстың арга-дуржулгазы болгаш камныг болганы-биле бүгү техникаларның байдалы эки. Тыва Чазактың биске деткимче кылдыр берген грейдери оон-даа ыңай шуудап ажылдаарынга улуг деткимче болур. Мындыг улуг техника садып алыры бичии организацияга амыр эвес. Ынчангаш даргаларывыска өөрүп четтирип, кышты эки эртеривиске бүзүреп тур мен” – деп, “Дорожник” КХН-ниң чиңгине директору Равиль Соян чугаалаан.
Ол ышкаш Ак-Довурактың орук тудуг-септелге эргелелинге база улуг грейдерни берген. Аңаа ооң мурнунда улуг грейдер турбаан. Ниитизи-биле 2 КамАЗ, 2 ортумак грейдер, 2 погрузчик, каток, 2 трактор бар.
“Бөгүн дендии өөрүнчүг хүн болду. Чазак Даргазы биске улуг чаа техниканы берген. Ынчангаш чурттакчы чоннуң болгаш бүдүрүлгениң мурнундан өөрүп четтирип тур бис. Улуг грейдер-биле ажылдаарга, күжү улуг болгаш, белен-даа, дүрген-даа. Бо техника чокка, орук кылдынмас. Орук тудуунга ол кончуг чугула” – деп, Ак-Довурактың орук тудуг-септелге эргелелиниң директору Шолбан Хертек өөрүшкүзүн илереткен.
Ук техникаларны кожууннарның хереглелин көрүп тургаш берген дээрзин Тыва Республиканың автооруктар эргелелиниң даргазы Саян Суглай-оол демдеглээн. “Бо кожууннарның кайызынга-даа кышкы үеде орук айтырыы нарыыдай бээр. Үе-шаанда дүргени-биле оруктарны аштап-арыглап, чурттакчы чонга эптиг байдалды тургузар дээш, тускай техникаларны берип турар” – деп, ол чугаалаан.
Чыжыргана СААЯ.
Чуруктарны Орук-транспорт яамызындан алган.
“Шын” №80 2023 чылдың октябрь 21
