РФ-тиң Чепсектиг Күштеринче хамаатыларны керээ ёзугаар шилип чорудар талазы-биле хемчеглерни 2023 чылда Тыва Республиканың шериг комиссариаттары канчаар чорудуп турарының дугайында чөвүлел хуралды Тываның Баштыңы Владислав Ховалыг март 21-де эрттирген.
Чөвүлел хуралга ТР-ниң Чазааның Даргазының оралакчызы Т.Б. Куулар, ТР талазы-биле кол федералдыг инспектор А.Г. Вавилихин, Тыва Республиканың шериг комиссарының албан-хүлээлгезин түр үеде күүседип турар А.В. Басенков, республиканың яамыларының сайыттары дээш өске-даа харыысалгалыг албан-дужаалдыг даргалар олурушкан.
РФ-тиң Чепсектиг Күштеринче чеже хамаатыларны керээ ёзугаар шилип чорудар талазы-биле 2023 чылда даалгаларны кожууннарның шериг комиссариаттарынче чорутканын, олар ол даалгаларны муниципалдыг эрге-чагыргаларга чедиргенин республиканың шериг комиссарының албан-хүлээлгезин түр үеде күүседип турар А.В. Басенков чөвүлел хуралга дыңнаткан. Хамаатыларны Чепсектиг Күштерже керээ ёзугаар шилип чорудар талазы-биле ажылга тайылбырны калбаа-биле чорударының чугулазын, аңаа патриотчу болгаш өске-даа хөй-ниити организацияларны идепкейлиг хаара тударын А.В. Басенков чугаалаан.
Чепсектиг Күштерже керээ ёзугаар шилип чорудар хамаатыларның эмчи шинчилгезин дүрген болгаш өй-шаанда эрттирер дээш, кандыг хемчеглерни ап чорударын ТР-ниң кадык камгалал сайыды А.К. Югай илеткээн.
Чепсектиг Күштерже келдириишкин ажылдарынга 26 млн рубльди, тускай дайынчы операцияның киржикчилериниң өг-бүлелериниң деткимчезинге 225 млн рубльди 2022 чылда регионнуң бюджединден чарыгдаанын, а 2023 чылдың эрткен үезинде 11 млн рубль чарыгдаттынганын республиканың саң-хөө сайыды О.С. Достай дыңнаткаш, Чепсектиг Күштерже хамаатыларны керээ ёзугаар шилип чорудар ажылга акшаландырыышкынның дөстерин дилеп тыварын чугаалаан.
Россияның Чепсектиг Күштеринге керээ ёзугаар шериг албаны эрттирерин суртаалдаар, массалыг информация чепсектеринге агитация ажылдарын калбартыр, хамаатылар шеригже чоруурунга идиглиг бүгү хемчеглерни ап чорудар саналдарны чөвүлел хуралдың киржикчилери деткээн.
/ Шаңгыр-оол МОҢГУШ.
