Дүүн, сентябрь 23-те, Кызыл хоорайның шериг комиссары Петр Ширко парлалга конференциязын эрттирген.
Тываның массалыг информация чепсектериниң ажылдакчыларынга Россия Федерациязының Президентизиниң «Россия Федерациязынга долу эвес мобилизацияны чарлаар дугайында» Чарлыының күүселдезинге хамаарышкан айтырыгларга тодаргай харыыларны берген.
Комиссарның медеглеп турары-биле алырга, ук мобилизацияга 50 харга чедир, 19 хардан өрү назылыглар киржир хүлээлгелиг. Шериг албан-хүлээлгезин күүсеткеш келген 19 харлыг оолдар курлавырда. 50 хардан өрү назылыг, курлавырда турбайн турар хамаатыларга ук мобилизация хамаарышпас.
Бо берге үеде республика иштинге аай-дедир чоруурда сагыыр дүрүмнер: ук мобилизацияга назы-хары дүгжүп турар шериг хүлээлгелиг хамаатылар херекчок черге кожууннардан кожууннарже аай-дедир чоруурда, киир бижидилгелиг кожуунунуң шериг комиссариадынга баргаш, чылдагаанын тайылбырлааш, демдегледип алыр.
Кадыының байдалы багай. Эмчи шинчилгези эрткен азы инвалид деп бижиктиг болза. Дөрттен хөй ажы-төлдүг хамаатылар. Бир эвес шериг билединде ажы-төлүнүң чамдыызы киир бижиттинмээн болза, шупту ажы-төлүнүң төрүттүнген дугайында херечилелдерин ап алгаш, шериг комиссариадынга чеде бээр.
Кандыг-ла-бир чылдагаан ужун ажы-төлүн чааскаан азырап чоруур адаларны мобилизацияже келдиртпейн барып болур.
Бир эвес ук мобилизацияга назы-хары дүгжүп турар, ынчалза-даа кандыг-ла-бир чылдагаан-биле операцияже барып шыдавас болза, тус черниң комиссариадынга барып илеткээр.
Келдириишкин албаан-даа болза, бодунуң чурттап турар чериниң шериг комиссариадынга документилерин тудуп алгаш чедип келир. Бир эвес чурттап турар черин солаан болза, эки тура-биле келгеш, кайда чурттай бергенин демдегледип алыр.
Келдириишкин келгени дээрге-ле, ол-ла дораан ыяап-ла чорууру эвес. Кижи бүрүзүн ынаар чорутпас. Шилилгени эртер-эртпезин база өөренип көөр.
Шериг комиссариадының ажылдакчылары ОШАЧКИ ажылдакчылары-биле кады мобилизацияга хамааржыр хамаатыларны тудуп ап турар деп интернет четкизинде тарай берген медээ меге. Ол шынга дүүшпес медээ дээрзин Кызыл хоорайның шериг комиссары Петр Ширко сагындырган.
Айдың ОНДАР.
