Мөңгүн-Тайганың херээжен чону мобилизация эгелээн хүнден тура демнежип, кадыг-берге байдалга төрээн чуртун камгалап чорупкан оолдарның буттары чылыг чорзун дээш хөй дүгүнден чүң уктарны аргып турар. Буянныг үүлеге катчырынче күзелдиг улусту олар кыйгырган.
''Кожууннуң чону идепкейлии-биле дузалажып эгеледи, малчыннарывыс дүктү эккээрге, херээжен чонувус, ээргеш, уктар аргып турлар'' - деп, Мөңгүн-Тайга кожууннуң чагыргазын удуртуп турар Чаян Салчак дыңнаткан.
Оон аңгыда дүүнгү хүнден эгелеп, мобилизацияже кыйгырткан чаңгыс чер-чурттугларының өг-бүлелеринге шээр малды дуза кылдыр чедирип берип эгелээнин ол медеглээн. Бо үеге чедир 20 шаа хойну чедирип берген.
Өг-бүлелерге аъш-чем-биле дузалаар сорулга-биле, чагырга Кызыл хоорайже автомашинаны чем бараан садып алыры-биле чоруткан. Даартагы хүнден эгелеп картофель биле хөмүр-дашты база чедирип эгелээр дээрзин Чаян Салчак чугаалаан.
