Шериглерниӊ чагааларын халас чорудар

«Чаӊгыс демниг Россия» партиязы шериг почтазынга хамаарыштыр хоойлуга эдилгелер киирерин саналдаан.

Тускай шериг операциязыныӊ шупту киржикчилери бажыӊынче чагааны халас чорудар эргелиг апаар.
Шак ындыг эрге амдыызында чүгле хуусаалыг шериг албанын эрттирип турар оолдарда бар. Бо берге айтырыгны шиитпирлээриниӊ дугайында шериглер боттары, оларныӊ чоок төрелдери-даа дилеп турар дээрзин «Чаӊгыс демниг Россияныӊ» Чиӊгине Чөвүлелдиӊ секретары Андрей Турчак демдеглээн:

«Мурнуку одуругда шериглерниӊ бажыӊынче чоруткан чагаалары чугула болур дээрзин үнелевези болдунмас. Фронтуда оглунуӊ, ашааныӊ азы акызыныӊ холунуӊ үжүү-биле бижээн чагаазы дег сагыш-сеткилди оожургадыр чүве-даа турбас боор. Ада-чурттуӊ Улуг дайыныныӊ чылдарында үш-булуӊчук чагааларныӊ тылга турган кижилерге кайы хире үнелиг чораанын бистер шупту кончуг эки билир болгай бис. Ынчангаш эки турачылар, мобилизастаан шериглер-даа херек апарганда боттарыныӊ амы-хууда чүүлдерин суп каан посылкаларны халас чорудуп болур.

Бистиӊ оолдарывысты болгаш оларныӊ чоок улузун деткиир дээш, кандыг-даа аргаларны ажыглаар бис. Шериг почтазыныӊ талазы-биле хоойлуга эдилгелер киирер, Күрүне Думазы эӊ-не кыска хуусааларда ону бадылаар боор».

Тиилелгени чоокшуладыр дээш, партия чугула шиитпирлерни дарый дүрген хүлээп ап турарын Адрей Турчак демдеглээн.
Р. Демчик белеткээн