Бо чылдың ноябрь 1-ден декабрь 31-ге чедир бүгү Россияга чарлаттынган күскү келдириишкин Тывада база уламчылап турар. Тывадан шеригже келдирткен оолдар кандыг байдалда шериг албан-хүлээлгезин эрттирип турарын Тываның Шериг комиссариадының кыйгыртыышкын килдизиниң начальниги майор Владимир Ондрак чугаалаан.
Ооң чугаазы-биле алырга, Тывадан шеригже кыйгырткан оолдар чыылда пунктузунда кээп эгелей берген. Оларны уткуп-хүлээп алгаш, шупту херек чүүлдер-биле хандырып, эртен, дүъште, кежээ аъшкарып-чемгерип турар.
«План езугаар Тывадан 600 кижини Россия Федерациязының регионнарында аңгы-аңгы шериг кезектеринче тарадыр чорудар» — деп, В. Ондрак чугаалаан.
Ол ышкаш шеригже келдирткен оолдар чыылда пунктузунга келгеш, база катап эмчи шинчилгези болгаш шилилгени эртер. Ооң соонда оларга шериг формаларны үлээр, дайынчы мергежилдер аайы-биле шериг белеткелиниң кичээлдерин чорудуп эгелээр. Ону 3 хонук дургузунда эрткен соонда, солдаттарны шериг кезектеринче тарадыр чорудар.
Чыылда пунктузунуң девискээринде шеригже кыйгырткан хамаатыларга шупту таарымчалыг байдалды тургускан дээрзин В. Ондрак демдеглээн. Удуур өрээлдер, чемненир өрээл, дыштаныр болгаш хостуг үезин эрттирер черлер бар.
Россияда шериг албан-хүлээлгезин күүседир хуусааны узадыр дугайында айтырыг көдүрүлбейн турар, ол бир чыл хевээр арткан деп, майор түңнеп чугаалаан.
Бистиң корр.