Март 27-де Кызылдың Аныяктар өргээзинге Тываның Баштыңы Владислав Ховалыгның чарлааны Тургузукчу күш-ажылдың болгаш өг-бүлениң ыдыктарының чылынга тураскааткан “Кадык өг-бүле – кадык төрел бөлүк: Тыва Республиканың социал төлевилелдери болгаш хөгжүлдениң планы” деп аттыг “төгерик стол” болуп эрткен. Ону ТР-ниң Националдар херектериниң талазы-биле агентилели база ТР-ниң Хөй-ниити палатазы организастап эрттирген. Аңаа регионнуң хөй-ниити организациялары, муниципалдыг эрге-чагырганың болгаш аңгы-аңгы шажын-чүдүлгелериниң төлээлери болгаш өскелер-даа киришкен.
Болган хемчегге ТР-ниң Чазак Даргазының оралакчызының хүлээлгезин күүседип турар Артына Бузур-оол сөс алгаш, өг-бүле институдунуң үнелелдерин болгаш кадык нацияны быжыглаар талазы-биле айтырыгларны деткиири чугула деп демдеглээн:
“Бо болуп турар “төгерик столга” өг-бүлениң, ооң үнелелдериниң кайы хире чугулазын сайгарып чугаалажып турарывыс дыка улуг ужур-уткалыг. Бистиң сорулгавыс – өзүп олурар салгалдың мөзү-бүдүжүн эки талаже хевирлээри, кадык-чаагай амыдыралды суртаалдаары болгаш өг-бүле институду эң-не кол рольду ойнаар” – деп, ол чугаалаан.
Болган хемчегниң киржикчилеринге бо чыл дургузунда боттандырар үш төлевилелди таныштырган: ТР-ниң Националдар херектериниң талазы-биле агентилелдиң удуртукчузу Светлана Ощепкова “Херелдер” деп өг-бүлелерде национал чаңчылдарны деткиири-биле тургустунган губернатор төлевилелин таныштырган; ТР-ниң Хөй-ниити палатазының даргазы Алесия Бажина “Глас народа” деп хамаатыларның чурагайлыг хөгжүлдеже хандыкшылын бедидер болгаш хөй-ниитиниң контролюн быжыглаар дугайында төлевилелди таныштырган. “Тыва Республиканың Адалар чөвүлели” регионалдыг хөй-ниити организацияның даргазы Сайдаш Монгуш “Эр сорук“ деп төлевилелдиң ужур-утказының дугайында таныштырган. Ылаңгыя бо төлевилел өзүп олурар салгалдың патриотчу кижизидилгезинге, эр кижиниң өг-бүлезинге камныг хамаарылгазы, кады чурттаан эжи болгаш уруг-дарыы дээш харыысалгазын шыңгыырадырынга ужур-дузалыг дээрзин регионнуң Адалар чөвүлелиниң даргазы демдеглээн.
Келир үениң кадык-чаагай ниитилелин тургузарынга өг-бүлениң ролюндан аңгыда, шажын-чүдүлгениң ролюнче кичээнгей салыры чугула деп Тыва Республиканың Камбы-лама эргелелинден болгаш Кызылдың епархиязындан хемчегге киржип келген төлээлери демдеглээн.
Болган хемчегни түңнеп тура, ооң киржикчилери 2028 чылга чедир социал адырны хөгжүдери-биле моон-даа соңгаар демниг ажылдажылганы күштелдирерин дугурушканнар.
Бистиң корр.
Буян ООРЖАКТЫҢ тырттырган чуруктары.
“Шын” № 12 2026 чылдың апрель 12
"Шын" солуннуң МАХ-каналынга каттыжыңар https://max.ru/join/egenQjfuGzdL6mt0tSEaIo13rmlpMRQzzSnZQdqfHFY