Декабрь 12-де “Водоканал-Сервис” КХН-ниң болгаш Кызыл хоорайда Республиканың консультация-диагностиктиг төвүнүң төлээлери Тыва Чазактың болгаш Улусчу фронтунуң деткимчези-биле боттанып турар “Шуптузун Тиилелгеже!” деп федералдыг төлевилелге каттыжып, тускай шериг операциязында киржип турар дайынчыларже чорудары-биле эргежок чугула херекселдерни гуманитарлыг дуза чыыр пунктуга эккеп берген.
Кызыл хоорайда Республиканың консультация-диагностиктиг төвүнүң улуг эмчизи Айдың Серен-оолдуң чугаалап турары-биле алырга, ук коллектив ТШО-да киржип турар чаңгыс чер чурттугларывыска чаңгыс эвес удаа дузазын кадып турарлар.
“Ажылдакчыларывыс-биле кады акша-хөреңгини чыггаш, бичежек хемчээлдиг инверторлуг генераторну, электри болгаш бензин-биле ажылдаар херекселдерни саткаш, Улусчу фронтуга дамчыдып бердивис. Оон ыңай газ-биле ажылдаар бичежек от кыпсыр херекселдерни болгаш чылыг уктарны база саткаш, чоруттувус” – деп, төптүң улуг эмчизи чугаалаан.
Бичежек инверторлуг генератор хову черге электри-биле хандыртынарының эң-не эптиг аргазы болуп турарын Айдың Серен-оол демдеглээн. Ол кывар-чаар материалга камналгалыг, көдүрерге-даа чиик, каяа-даа чорааш, барган черинге ажылдадыпкаш, радиостанцияларны, мобильдиг телефоннарны, аай-дедир харылзажырынга ажыктыг өске-даа дериг-херекселдерин кожупкаш, долдуруп алыр аргалыг болур. Ук дериг-херекселдиң дааш чок болганы база кончуг таарымчалыг.
Бо акция ТШО киржикчилеринге дуза чедирип турар төптүң доктаамал эрттирип турар хемчеглериниң бирээзи дээрзин ол демдеглээн. Ооң чугаалап турары-биле алырга, тыл быжыг болурга, дайынчылар деткимчени эскерип, тиилелгеже бүзүрели улгадыр. Ынчангаш бистиң деткимчевис оларга улуг ужур-дузалыг.
Кызыл хоорайда “Водоканал-Сервис” КХН-ниң төлээзи Николай Коровин боттарының чыып алганы акша-хөреңгизи-биле бичежек генераторлар, техника септээр херекселдер, бензин-биле ажылдаар 3 генераторну, домкратты, техниктиг ажылдар чорударынга чугула херек херекселдерни сатканын дыңнаткан.
Амгы үеде балыглангаш, кадыының аайы-биле чанып келген “Чолдак” деп кыйгы аттыг дайынчы бо бүгү чорудуп турар херекселдер фронтуга кончуг ажыктыг, ылаңгыя бот-боттарының аразынга харылзажырда, генераторларның ажыы улуг дээрзин демдеглээн. Ооң ТШО мурнунда ажылдап турган коллективи “Водоканал-Сервис” КХН-ниң база дайынчыларга дузалажып турарынга сеткилинден өөрүп турар.
Улусчу фронтунуң “Шуптузун Тиилелгеже” деп акциязы патриотчу чоруктуң болгаш Тываның чурттакчы чонунуң чаңгыс деминиң үлегер-чижээ апарган. Янзы-бүрү назы-харның, мергежилдиң кижилери чурттуң эргелерин камгалап турар дайынчыларны деткиири-биле демниг күжениишкинни көргүзүп турарлар.
Даартазында, декабрь 13-түң хүнүнде, дайынчыларга чоннуң чыгган кышкы гуманитарлыг дузазын 20 тонна чүдүрер фура болгаш 5 тоннаның соодукчулуг чүък машиназынга чүдүргеш, чоруткан. Аңаа доңурган эътти, техниктиг херекселдерни, чаштынар четкилерни чүдүрген.
Улусчу фронтунуң регионалдыг салбырының удуртукчузу Саима Далчинниң чугаалап турары-биле алырга, бо удаа 3,5 тонна эътти чыгган. Ооң-биле кады “Нива” маркалыг автомобильди болгаш 12 мотоциклди база чоруткан.
“Деткикчилерниң болгаш шериглерниң боттарының акша-хөреңгизи-биле саткан техниканы база фураже чүдүрүптерин дайынчылар дилээн. Ол ышкаш деткимче дузаже республиканың чурттакчы чонунуң чыгган генераторлары, чылыдар пушкалары, феннери, чылыг идик-хеви база кирип турар” – деп, Саима Далчин дыңнаткан.
Чүъктү аай-дедир дажыглап, машинаже чүдүреринге Тываның база бир идепкейлиг “Тиилелгениң волонтёрлары” эки турачылар бөлүүнүң төлээлери дузалажып турарлар. Оларның аразында республиканың өөредилге черлериниң дузааргак, сагыш човангыр сургуулдары, студентилери бар.
“Бис ТШО эгезинден тура-ла дайынчыларже гуманитарлыг дуза чорударынга дузалажып турар бис. Бистиң чаңгыс чер чурттугларывыс тайбың ак-көк дээр дээш тулчуп турда, бис оларга дузалажыр ужурлуг бис. Бистиң аравыста школачылар, сургуулдар дайынчы акыларывыстың хей-аъдын көдүрери-биле чагааларны бижип, оларның чоок кижилери болдунары-биле дузалажырга, олар боттарының ээлчээнде алган чагааларын, херекселдерин тырттыргаш, бисче чорудуп, өөрүшкүзүн илередип турарлар. Ол бистиң дузалажыр күзеливисти улам-на күштелдирер” – деп, Тиилелгениң волонтёру Эрес Дотпаа чугаалаан.
Чүък машиназы ол хүн Кызылдан Свердловскуже үнүпкеш, Донецкиге барып доктаар. Машина дедир кел чыткаш, Белгород облазының Ровеньки суурунче база кирер. Гуманитарлыг дузаны Чазак Даргазының оралакчызы Айдыс Сынаа, Дээди Хуралдың (парламентиниң) депутады Эрес Хуурак үдеп чедирер. Кышкы үеде чоннуң чоруткан дузазын дайынчылар декабрь айның 20 үезинде алырлар.
2024 чылдың эгезинден тура республиканың сагыш човангыр чурттакчы чону болгаш албан черлери ТШО-да киржип турар дайынчыларывыска эвээш эвес машина-техниканы чоруткан. Ол дайынчыларның аай-дедир аргыжарынга кончуг ажыктыг. Аңаа машиналар болганчок үрели бээр. Ынчангаш техника талазы-биле деткимчени үргүлчү чедирери чугула дээрзин Саима Далчин демдеглээн.
Улусчу фронтунуң гуманитарлыг дуза чыылдазын организастап турары “Шуптузун Тиилелгеже!” деп төлевилели бүгү Россияда ажылдап турар.
Чыжыргана СААЯ.
Ада Тюлюштуң тырттырган чуруктары.
“Шын” №96 2024 чылдың декабрь 14
