Апрель 22-ден 26 хүннеринде 2024 чылдың доозукчуларынга “ЕГЭ – это про100” деп марафон онлайн хевирде болуп эрткен.
Чаңгыс аай күрүне шылгалдаларынга чедир 1 ай арткан. Шак ол үени ажыктыг эрттирип алыр херек. Россияның Өөредилге яамызы доозукчуларга ЧКШ-тиң (ЕГЭ) даалгаларын эки сайгарып алырынга, боттарын хынаарынга, канчаар белеткенириниң шынарлыг планын тургузарынга, шылгалдалар үезинде канчаар алдынарынга дузалажыры-биле эксперттерни чалаан.
Ол Россияның өөредилге хайгааралының албан ёзугаар арыннарынга болур: ВКонтакте (https://vk.com/rosobrnadzor), Rutube (https://rutube.ru/channel/25110944/)
Тыва Республиканың девискээринге база «ЕГЭ – это про100» марафон ёзугаар неделя санында аңгы-аңгы эртемнерге ЧКШ-ке белеткенир консультацияларны онлайн хевирге эрттирип турар. Ында кол эртемнерниң башкылары, Тываның регионалдыг эртемнер комиссиязының кежигүннери доозукчуларга хыналда материалдарда кандыг өскерилгелер барын, шылгалдага бот-белеткелдиң аргаларын, даалгаларны канчаар үнелээрин чугаалап берип, чижек даалгаларны сайгарып турарлар.
Кызылдың 3 болгаш 2 дугаар школаларының физика башкылары Клавдия Михайлова биле Светлана Сандара физика эртеминде ЧКШ-тиң делгереңгей сайгарылгазын кылып, каш балл салырын, болгу дег частырыгларны өөренип көрген.
Эң-не баштай математика, орус дыл, физика, англи дыл эртемнеринге консультацияны чоруткан. Апрель айның төнчүзүнге чедир биология, химия, төөгү, ниитилел эртемнеринге консультацияларны эрттирерин планнап турар.
“Онлайн хевирниң консультациялары дээрге 11-ги класстарның ЧКШ-ке белеткелинче угланган төлевилел-дир. Чаа технологиялар, ылаңгыя Сферум, республиканың бүгү-ле булуңарында хөй санныг өөреникчилерни хаара тударынга улуг дуза болган. Ол ышкаш Тываның кожууннарында башкылар база дорт дамчыдылгаларга идепкейлиг киржип, өске школалардан коллегаларынга айтырыгларны база салып турарлар. Доозукчуларны сорук киирери-биле эрткен чылдарның 100 баллга ЧКШ-ти дужаап турган доозукчуларын база хаара тудуп турар бис” – деп, өөредилге сайыды Елена Хардикова демдеглээн.
Ниитизи-биле бир консультацияга безин муң-муң доозукчулар киржип, айтырыгларны идепкейлиг салып, саналдарны киирип, ЧКШ-ке белеткениринге боттарының ажыктыг аргалары-биле үлежип турарлар.
Чыжыргана СААЯ.