Тыва Республиканың В. Көк-оол аттыг национал хөгжүм-шии театрынга чылдың-на болуп эртер Россияның студентилериниң Татьяна хүнүнге тураскааткан ректор балы болуп эрткен. Байырлыг хемчегге Тываның күрүне университединиң идепкейжилери, республиканың ортумак профессионал өөредилге черлериниң студентилери, Кызылдың президентиниң кадет училищезиниң кадеттери киришкен.
“Хүндүлүг студентилер! Силер бүгүдени Студентилер хүнү-биле байыр чедирип тур мен. Бо байырлал билиглерже, бот-сайзыралче болгаш чаа-чаа ажыдыышкыннарже чүткүп чоруур кижилерни каттыштырып турар. Студент чылдар дээрге кижиниң делегейже көрүжү хевирлеттинер, келир үеде ажыл-албанга депшилгениң таваан салырынга ажык-дузалыг чаа чаңчылдарны болгаш хей-аът көдүрлүүшкүнүн шиңгээдип алыр, чаа эш-өөр тып алыр онзагай үе-дир” – деп, Тываның күрүне университединиң ректору Ольга Хомушку чугаалаан.
Ол ышкаш университет бодунуң салым-чаяанныг, мурнунда салган сорулгаларын чедип алыр дээш чүткүп чоруур идепкейлиг болгаш сагыш човангыр студентилери-биле чоргаарланып чоруур дээрзин демдеглээн: “Силерниң өөредилге, эртем, спорт болгаш чогаадыкчы угланыышкыннарда чедиишкиннериңер дээрге бистиң шуптувустуң ниити чоргааралывыс-тыр. Силерни шилип алган адырыңарга мергежээн кижилер апарзын, шынарлыг эртем-билигни чедип алзын дээш, силерниң күш-шыдалыңарны сайзырадыры-биле бүгү байдалды тургузуп турар бис.
Силерге быжыг кадыкшылды, өшпес-төнмес күш-шыдалды, идепкейжи чорукту, бодуңарга болгаш күш-шыдалыңарга бүзүрелди күзедим. Студент чылдарыңар эң-не чырык, ханы уткалыг болуушкуннар, уттундурбас сактыышкыннар, чаа кижилер-биле байлак болзун. Байырлал-биле! Чедиишкиннерни болгаш чаа-чаа тиилелгелерни күзедим!”.
Тыва Республиканың Баштыңы Владислав Ховалыгның адындан ачы-дуза акцияның киржикчилеринге ТР-ниң Чазааның Даргазының оралакчызы Алексей Сазан-оол байырын чедирген. Ол бодунуң байыр чедириишкининге чурттуң сайзыралынга аныяктарның үлүг-хуузу улуг дээрзин демдеглээн:
“Бөгүн силер чурттуң эң-не үнелиг өнчүзү-дүр силер. Силер Россияның келир үезин тургузуп турар силер. Бодуңарның арга-шинээңерни сайзырадып, чаа угланыышкыннарны ажыдып, дидим бодалдарны амыдыралга боттандырып, бистиң амыдыралывысты экижидип турар силер. Силерге өшпес-төнмес хей-аът көдүрлүүшкүнүн, солун-солун ажыдыышкыннарны, бүзүрелдиг чаңгыс үзел-бодалдыг кижилерни, сорулгаларыңарже бүзүрелдиг бурунгаарлаашкынны күзедим».
Бо чылын ачы-дуза чедириишкинниг ректор балынга “Тываның Маадырлары” кадрлар программазының тиилекчилери болган тускай шериг операциязының киржикчилери база киришкен. Кады чурттаан эштери болгаш Тываның күрүне университединиң башкылары-биле кады “Мээң Россиям” деп вальсты олар бараалгаткан. Танцы-самны уран чүүл удуртукчузу Максим Овчинников белеткээн.
Тываның күрүне университединиң чугаалап турары-биле алырга, ачы-дуза балынга чыгдынган акша-хөреңгини шуптузун тускай шериг операциязында киржип турар чаңгыс чер чурттугларывысче чорудар.
Ол ышкаш байырлыг хемчег үезинде Тываның күрүне университединиң ректорунуң стипендиязы дээш мөөрейниң тиилекчилерин база шаңнаан. Шилилге мөөрейниң түңнелинде 60 кордакчыдан 9 тергиин студентини тодараткан.
Тываның күрүне университединиң студентизи Вангчен Демчик – Тываның Баштыңының шаңналын алганнарның бирээзи. Ол школачы чылдарындан тура-ла Чалыы көрүкчүлер театрынга барып, рольдарны ойнап, ол ышкаш информастыг технологиялар дээш янзы-бүрү угланыышкыннарга сайзырадып келген салым-чаяанныг студент. “Тываның Баштыңындан шак мындыг шаңнал алыры канчаар-даа аажок өөрүнчүг-дүр. Бо шаңнал меңээ оон-даа ыңай улаштыр сайзыраар күчү-күштү берип, сорук киирип, хей-аъдымны көдүрүп тур. Шупту студентилерге эң-не кол чүүл өөредилгезинге, янзы-бүрү талаларга боттарын шенеп, бодунуң сонуургалын тып, бүгү талалыг сайзыраарын, бергелерге торулбайн, бедиктерже улам-на чүткүүрүн күзедим” – деп, Вангчен Демчик чугаалаан.
Бо хемчег чылдың-на ачы-дуза чедирер хемчег апарганы өөрүнчүг. Ол билет садып алган кижи бүрүзүнге чурттуң ниити ажыл-херээнге үлүг-хуузун киирер арганы тургузуп турар. Тускай шериг операциязында киржип турар чаңгыс чер чурттугларывыска дуза чедиреринден аңгыда, студентилерниң чер-чуртунга ынакшылын, дузааргак сеткилин база оттуруп турар. Тываның аныяктары чурту-биле болгаш дайынчы маадырлар-биле кады дээрзин студентилерге анаа-ла сөстер-биле эвес, а херек кырында кылдынып турар ажыл-иш-биле көргүзер арга болган.
Чыжыргана СААЯ.
Чурукту ТывКУ-нуң социал четкиде арнындан алган.
“Шын” №3 2026 чылдың январь 29
