Эрткен чылда чарлаттынган Россияның чоннарының культурлуг өнчү чылында бедик чедиишкиннерлиг, тергиин түңнелдерлиг болган чогаадыкчы коллективтер январь 27-де Улусчу чогаадылга бажыңынга “Салым-чаяанныглары-биле алдаржаан Тыва” деп каттышкан концертти чонга бараалгаткан.
Ол кежээ болган солун хемчег Бүгү-россия чергелиг база чоннар аразының фестивальдар, мөөрейлерниң Гран-при шаңналының эдилекчилери, лауреаттар, дипломантыларның парады-биле эгелээн. Аңаа хөйге билдингир Юлия Хирбээниң удуртканы “Урянхай” мода агентилелиниң кижизидикчилериниң өңгүр чараш үнүүшкүнү оон-даа байырланчыг шинчи киирген.
Шылгарааннарны демдеглээн түңнел концертке ТР-ниң культура сайыды Виктор Чигжит байыр чедирип сөс алган: «Бөгүн дыка-ла онза хүн-дүр. 2022 чылдың түңнелдерин үндүрүп турарывыс бо. Бо чылын Тываның культура албан черлериниң чедиишкиннерин чада аайы-биле көргүзер деп шиитпирлээн чүве. Ынчангаш Россияның чоннарының Культурлуг өнчү чылын хаап тура, бо улуг концертке улусчу чогаадылга талазы-биле тулган чедиишкиннерлиг болган танцы-сам, улустуң ырлары, театржыткан көргүзүгер болгаш чараш национал костюмнарны, тыва дизайнерлерниң коллекциязындан мода көрүлдези, вокал-инструменталдыг ансамбльдарның композициялары дээш өске-даа солун чүүлдерни көрүп болур. Өөрүнчүг чүүл, концертте республиканың кожууннарындан “Чоннуң”, “Үлегерлиг” деп ат эдилээн төлептиг коллективтерниң киржип турары».
Ооң соонда шаңналдар тыпсыр ёзулал болган. Аңаа Тыва Республиканың Культура яамызының шаңналдарын ыраажылардан Аким Монгушка, Найыр Лапчарга, “Сайзырал” ыры-хөгжүм ансамбльга, хоочуннарның “Надежда” ыры ансамблинге, «Өлчей-Кежик» улустуң танцы коллективинге, «Эзир-Уя» аас чогаал ансамблинге, «Баян-Дугай» биле “Скифтер” мода болгаш костюм театрларынга, Кызылдың Элээди көрүкчү театрынга болгаш «Улуг-Хем» ыры болгаш танцы ансамблинге Тываның культура сайыды Виктор Чигжит база Республиканың улусчу чогаадылга төвүнүң директору Елена Ондар тывыскан.
Ол-ла шаңналдар аразындан онза шаңнал – “РФ-тиң улусчу чогаадылгазының алдарлыг коллективи” бедик атты ТР-ниң уран чүүлүнүң алдарлыг ажылдакчызы Аржаана Доспанның удуртканы «Улуг–Хем» ыры болгаш танцы ансамблинге тывыскан.
Кежээниң байырлыг кезээ доозулган соонда, концерт эгелээн. Шынап-ла, ол хүн сценаже 2022 чылда эң-не бедик чедиишкиннерлиг болган Улуг-Хем, Чөөн-Хемчик, Эрзин, Чеди-Хөл, Тес-Хем, Бии-Хем, Кызыл кожууннар болгаш Кызыл хоорайның коллективтери чыылганнарга солун концерт оюн-көргүзүүн бараалгаткан.
Сорунза МОНГУШ,
ТР-ниң Культура яамызының медээзи-биле.
Республиканың улусчу чогаадылга төвүнүң чуруктары.
