Бичии турумда ачам мени «Шын» солунга чүүлдерден бижип өөрен дээр чораан. Шынап-ла, 8 класс тургаш, солунче бижип эгелээн мен.
Ол үеде почтальонувус, амгы үеде улуг назылыг честевис Түкче Комбу турган. Почтальон кээрге-ле, ачам мени: "Солунну эккел, уруум" деп айбылаар турган. Оон бээр-ле «Шын» солунну номчуп эгелээн мен. «Шын» солун чокта чалгааранчыг болбайн канчаар. Ында республикада, чуртта болуп турар болуушкуннарны бижип турар болгай.
Амгы үеде «Шын» солунну хоочуннар-ла хөй чагыдып турар. Бистиң суурнуң хоочуннары колдуу шупту чагыдылгалыг. Чижээ, Оодус Кыргысовна Сараагай, Ноозун Баадырович Чалзырай, Саяна Кыргысовна Хүдер дээш оон-даа өске идепкейлиг солун чагыкчылары бар.
Хомуданчыг чүүл – аныяктар солун чагытпас, номчувас боор-дур. Шупту чүүлдерни интернеттен көрүп алыр бис дээр. Бис, кырганнар, ону көрбейн турар болгай бис. Ынчангаш албан-биле чагыдып, оон хөйнү билип ап турар бис. Ынчангаш «Шын» солунну номчуп, чыл санында чагыдып ап турар болза эки.
Чечекмаа САДИ, ТР-ниң алдарлыг ажылдакчызы.
Эрзин кожуун, Мөрен суур.
Чурукту авторнуң архивинден алган.
“Шын” №14 2024 чылдың февраль 24
