Тываның Баштыңы Владислав Ховалыг Кызыл кожууннуң Каа-Хем суурда «Преображенский» микрорайонда туттунган чаа суг чыыр черни хынаан. Төлевилелди «Чурттаар оран-сава болгаш хоорай хүрээлеңи» Президентиниң национал төлевилелиниң «Арыг суг» федералдыг программазы-биле чартык чыл дургузунда боттандырган.
«Чоокку үеде чаа суг чыыр чер албан черлерин: уруглар садтарын, полицияны шынарлыг ижер суг-биле хандырар ужурлуг. Ол ышкаш тудуп турар улуг пунктулар: 825 олуттуг школа болгаш спорт-культура төвүн база. Участоктарны кезип, керээ чарган кижилер-биле чугаалаштым, дыштаныр хүннерде күштерни болгаш курлавырларның хаара тутканын хынадым» — деп, Владислав Ховалыг бодунуң блогунда бижээн.
Преображенский микрорайоннуң 6 муң ажыг чурттакчылары суг чыыр черни тудуп, ону төпчүткен суг хандырылгазынче кошканы-биле шынарлыг ижер сугну алган. Келир үеде суурнуң ам-даа үш микрорайонун суг хандырылгазынга кожар.
Ол ышкаш Тывада «Арыг суг» төлевилел езугаар Ак-Довурак хоорайда эрги суг чыыр черни чаартып турар. Мында 30 муң чедир чурттакчылыг хоорайга таарыштыр тургускан чаа гидравликтиг тургузугну тудуп турар.
Тываның Тудуг яамызының медээзи-биле алырга, суг алыр ийи объектини ажыглалче киирген соонда, Тываның чурттакчы чонунуң 78 хуузу арыг суг-биле хандыртынып, республиканың чурттакчыларының 47 хуузу төпчүткен суг хандырылгазының системазынга коштунар.
“Арыг суг” федералдыг программаның кол сорулгазы – Россияның чурттакчы чонунуң көвей кезиин төпчүткен суг хандырылга системаларындан бедик шынарлыг ижер суг-биле хандырары. Ооң мурнунда программа «Экология» национал төлевилелдиң составынга турган, Россияның Президентизи Владимир Путинниң эгелээшкини-биле национал төлевилелдер 2019 чылда эгелээнин сагындыраал.
А. МОНГУШ.
Чингис СААЯНЫҢ тырттырган чуруу.
«Шын» №93 2024 чылдың декабрь 4
