«Шынчы демдек» системазын ажылдадыры Тываның Чазааның ажыл-чорудулгазының аңгы адыры апаар.
Республиканың Баштыңы Владислав Ховалыгның дужаалы-биле ол ажылды углап-баштаар ведомстволар аразының штавын тургускан, ону Чазак Даргазының оралакчыларының бирээзи удуртур. Штабтың сорулгазы– бүдүрүкчүден садыгжыже бараан бүрүзүнүң шимчээшкинин контрольдаары болгаш өттүндүр кылган база шынар чок продукциядан хереглекчилерни камгалаар сорулгалыг Бүгү-российжи маркировка системазынче киржир кылдыр тус черниң сайгарлыкчыларын болгаш бараан бүдүрүкчүлерин хаара тударын хандырары.
Тывада «Шынчы демдек» кежигүнү кылдыр бүрүткеттинген 480 садыг-саарылга черлериниң аразындан чүгле 220-зи боттарының кассазын системаже кожуп, садып алыышкын бүрүзүнүң медээзин ажыткан. Бо арганы ажыглап тургаш, чүгле үндүрүг органнары эвес, а садып алыкчы бараанның бүгү төөгүзүн хайгаарап болур – ону кым болгаш кажан бүдүрген, кайыын болгаш кымдан келген дээш оон-даа өске.
Тургустунган штабтың сорулгазы – тыва сайгарлыкчыларны «Шынчы демдек» системаже бүрүткедирин дүргедедири, ол ышкаш аңаа долу киржилгеге херек дериг-херекселдер болгаш программа продукциязы-биле садыг-саарылга черлерин чепсеглээри болур.
Продукцияны маркировка системазынче шапкын киирери сайгарлыкчыларның боттарының, ылаңгыя шынчы ажылдаарын оралдажып турар кижилерниң сонуургалында деп, Тываның Баштыңы санап турар. Продукцияның бедик шынарын хынаар болгаш бадыткаар арга кылдыр бо системаны киирерин Россияның Президентизи саналдаан, ынчангаш төлевилелди бодунуң логиктиг түңнелинге чедирер. Ол дээрге контрафакт барааннардан рынокту хостаары болгаш өттүндүр кылдынган барааннарны шынчы эвес тарадып турар улусту харыысалгага онаары-дыр.
ТР-ниң Чазааның парлалга албаны.
“Шын” №87 2024 чылдың ноябрь 13